«Qymbatty qazaqstandyqtar!
Barshańyzdy Ulystyń uly kúnimen shyn júrekten quttyqtaımyn!
San ǵasyrlyq tarıhy bar Naýryz meıramy búginde el birliginiń, kelisim men turaqtylyqtyń jarqyn sımvolyna aınalyp otyr.
Qazaq halqynyń uly mádenıeti men baı salt-dástúrinen bastaý alǵan mereke izgilik pen yntymaq, tatýlyq pen syılastyq syndy máńgilik qundylyqtardyń jarshysy sanalady.
Búgingi tańda álemniń ár túkpirinde bolyp jatqan oqıǵalar bul meıramnyń mańyzdylyǵyn odan ári arttyra túskeni sózsiz. Ol bizge qoǵamdaǵy kelisimniń, kópultty elimizdegi tynyshtyq pen mamyrajaı ómirdiń qadirin túsinýge kómektesedi.
Tirshilikti túletken kóktem merekesi janymyzdy jadyratyp, Otanymyzdyń ıgiligi jolynda jańa jetistikterge jetý úshin boıymyzǵa kúsh-qýat pen sarqylmas jiger beredi.
Ulystyń uly kúninde barshańyzǵa myqty densaýlyq, baq-bereke tileımin! Áz-Naýryz shańyraqtaryńyzǵa yrys pen molshylyq ákelsin!», delingen Elbasy quttyqtaýynda.
