Is-shara aıasynda Qazaqstan Respýblıkasynyń Chehııa Respýblıkasyndaǵy Elshiliginiń bastamasymen «Ahmet Baıtursynuly jáne Alash» kitabynyń tusaýkeser rásimi ótti. Kitap alǵash ret cheh jáne aǵylshyn tilderine aýdarylyp, oǵan qazaq mádenıetiniń kórnekti qaıratkerleri men qazirgi zamanǵy «Alashtanýshy» ǵalymdardyń eńbekteri endi. Qazaq tilinen aǵylshyn tiline aýdarýdy Qazaqstan Respýblıkasynyń Ulttyq aýdarma bıýrosy júzege asyrdy.
Is-shara barysynda qazaq memlekettiligin qalyptastyrý máseleleri talqylanyp, Qazaqstannyń táýelsizdik kezeńindegi jetistikteri týraly syndarly pikir almasý boldy. A. Baıtursynuly men «Alash» qozǵalysynyń el tarıhy men ulttyq sanany qalyptastyrýdaǵy biregeı róli atap ótildi.
Tanymal cheh ǵalymy, professor Iırjı Shıma óz sózinde «Men óz halqym men elimniń tarıhyn zerttep qana, ótken ǵasyrdyń sońynda jańadan paıda bolǵan táýelsizdiktiń erekshe qundylyǵyn túsine bastaıtyndyǵyma senimdimin», dedi.
Sondaı-aq, kezdesýde Karlov ýnıversıtetiniń, Chehııa Ulttyq kitaphanasynyń ókilderi, jýrnalıster men «Qazaqstan dostary» klýbynyń ókilderi sóz sóıledi. Qatysýshylar ulttyq tarıhty jan-jaqty jáne tereń zertteýdiń mańyzdylyǵyn atap ótti.
Qazaqstandyq taraptan onlaın formatta «Egemen Qazaqstan» Respýblıkalyq gazeti» AQ Basqarmasynyń tóraǵasy Darhan Qydyráli, Sh. Ýálıhanov atyndaǵy tarıh jáne etnologııa ınstıtýtynyń dırektory Zııabek Qabyldınov, A. Baıtursynuly atyndaǵy Til bilimi ınstıtýtynyń dırektory Anar Fazyljanova, QR BǴM Ǵylym komıtetiniń Memleket tarıhy ınstıtýty dırektorynyń orynbasary Búrkitbaı Aıaǵan, L.N. Gýmılev atyndaǵy Eýrazııa ulttyq ýnıversıtetiniń professory Sataı Syzdyqov, E.A. Býketov atyndaǵy Qaraǵandy memlekettik ýnıversıtetiniń etnomádenı jáne tarıhı-antropologııalyq zertteýler ortalyǵynyń jetekshisi Záýresh Saqtaǵanova, M. V. Lomonosov atyndaǵy Máskeý memlekettik ýnıversıtetiniń professory Altaıy Orazbaeva qatysty.
Dóńgelek ústel sońynda Qazaqstan Elshiligi Karlov ýnıversıtetine «Ahmet Baıtursynuly jáne Alash» kitaptaryn cheh jáne aǵylshyn tilderinde syıǵa tartty.
Erterekte habarlaǵanymyzdaı, ataqty qazaq ǵalymy jáne qoǵam qaıratkeri Ahmet Baıtursynulynyń 150-jyldyǵy 2022 jyly atalyp ótiletin IýNESKO-nyń Aıtýly mereıtoılar tizimine qosylǵan bolatyn.
