«Shyn máninde, bul jańa Qazaqstandy qurý kezeńiniń basy. Bastamalardyń aýqymy men mazmuny aýqymdy, oǵan tómendegi sıfrlar dálel. Bir ǵana Konstıtýsııanyń ózinde 30-dan astam bapqa ózgertýler engizý kerek. Sonymen qatar 7 konstıtýsııalyq zań men 15-ten astam zańǵa ózgerister engizý josparlanýda.
Mınıstr sonymen birge saıası reformalardyń negizgi baǵyttaryna toqtaldy: Prezıdenttiń ókilettiligin shekteý; saılaý prosesin jańǵyrtý; saıası partııalardy tirkeý tártibin jeńildetý; sot jáne quqyq qorǵaý júıesin jetildirý; azamattardyń negizgi quqyqtaryn qorǵaý, azamattyq qoǵam ınstıtýttary men buqaralyq aqparat quraldarynyń rólin kúsheıtý. Kezdesýimiz aıasynda ata-babamyzdyń demokratııalyq dástúriniń jańǵyrýyn atap ótýge bolady – jurtshylyq aldynda talqylap, mańyzdy sheshimder qabyldaý. Osyǵan oraı, qoǵamdyq dıalogtiń birtutas úlgisin qalyptastyratyn, bılik pen halyq arasyndaǵy ózara is-qımyldy kúsheıtetin «Ulttyq quryltaı» qurylady», dep atap ótti Qanat Mýsın.
Bul rette jumys istep turǵan barlyq qoǵamdyq keńesterdiń qyzmeti júıelenip, olardyń músheleri Ulttyq Quryltaıdyń quramyna enetin bolady. Bul sharalar azamattyq qoǵam ınstıtýttarynyń rólin kúsheıtýge baǵyttalǵan.
Mınıstrdiń aıtýynsha, Prezıdenttiń usynystaryn júzege asyrý úshin atqarylatyn jumys kóp. О́z kezeginde Ádilet mınıstrligi Joldaýdy iske asyrý úshin normatıvtik quqyqtyq taraptan qamtamasyz etedi.
Kezdesý barysynda mınıstr halyqty, qoǵam belsendilerin mazalaǵan saýaldarǵa jaýap berdi. Onyń ishinde saıası partııalardy, menshik ıeleriniń birlestigin, taýarlyq belgini tirkeý, halyqtyń quqyqtyq saýattylyǵyn kóterý, jeke azamattardy bankrot dep tanýǵa baǵyttalǵan zań jobasy, notarıýstar kórsetetin qyzmettiń sapasy, sonymen qatar, zań mamandyqtary boıynsha kásibı kadrlardy daıarlaý baǵytynda suraqtar qoıyldy.
