Asa tájirıbeli qyzmetkerlerden arnaıy qurylǵan jedel tergeý toby tórt aı boıy qylmystyq top jumysyn baqylaǵan. IIM Esirtki qylmysyna qarsy is-qımyl departamenti bastyǵynyń mindetin atqarýshy Asqar Muhametqalıevtiń aıtýynsha, ustalǵandar Qaraǵandy jáne Temirtaý qalalarynyń turǵyndary. Olar 2021 jyldyń mamyrynan bastap osy ýaqytqa deıin Nur-Sultan, Almaty qalalarynda, sondaı-aq, Qaraǵandy jáne Shyǵys Qazaqstan oblystarynda asa iri kólemde sıntetıkalyq esirtkini satýmen aınalysqan.
Ustalǵandardyń aıtýynsha, esirtkini satý Telegram áleýmettik jelisindegi ınternet-dúken arqyly júrgizilgen. Toptyń qyzmeti jaqsy uıymdastyrylǵan. Toptyń 10 múshesi arasynda uıymdastyrýshy, býyp-túıýshi, operator, dıler, esirtkini tyǵyp jasyrýshy rolderi men fýnksııalary naqty bólingen.
«Fıgýranttardyń turǵylyqty jerin tintý kezinde satýǵa daıyn 300 dozadan astam esirtki zaty tárkilendi, sonymen qatar jalǵa alynǵan páterlerdiń birinde shamamen 3 keli sıntetıkalyq zat («mefedron» jáne «alfa-PVP»), esirtki zattardy oraý úshin qoldanylatyn zattar (elektron tarazy, zip qaltashalar) tárkilendi», delingen habarlamada.
Qazaqstan Respýblıkasy Qylmystyq Kodeksiniń 297-baby 3-bóligi 5-tarmaǵy boıynsha «Esirtki, psıhotroptyq zattardy, sol tektesterdi ótkizý, jóneltý nemese ótkizý maqsatynda zańsyz daıyndaý, saqtaý, tasymaldaý» boıynsha sotaldy tergeý bastalǵan. Qylmystyq toptyń músheleri múlki tárkilenip, 15 jylǵa deıin bas bostandyǵynan aıyrylýy múmkin.
