Qoǵam • 31 Naýryz, 2022

Áleýmetti demeıtin qor

33 ret kórsetildi

Saýda oryndaryndaǵy kúnnen-kúnge qymbattap jatqan azyq-túlik túrleriniń baǵalary buqara halyqtyń búıirine batady-aq. Mine, osyndaı jýannyń jińishkerip, jińishkeniń úzilgeli turǵan shaǵynda áleýmetti qoltyǵynan demep jibermese, áleýmettik jaǵdaıdyń kúrdelengenniń ústine kúrdelene túseri sózsiz.

Sonda ne istemek kerek? Máselen, Qaraǵandy oblysynda bul baǵyttaǵy jaǵdaı sheshimin tapqan. Qazirgi tańda óńirdegi turaqtandyrý qorynda qant, qaraqumyq, ósimdik maıy sııaqty azyq-túliktiń 722 tonna kólemindegi qory qurylǵan. Budan bólek, apta saıyn belgilengen baǵamen saýdaǵa kókónis jetkizilimderi retke keltirilip otyrady.

«Saryarqa» ÁKK» AQ basqarma tóraǵasynyń birinshi orynbasary Máýlen О́mirtaev turaqtandyrý qory­nyń azyq-túlik ónimderi baǵasyn ustap turýǵa arnalǵanyn aıtady.

– Bul baǵytta eki mehanızm qol­danylady. Birinshisi – bakaleıa ónim­de­rin ózimiz satyp alamyz jáne satamyz. Taýar ıntervensııalary komıssııanyń sheshimi boıynsha júrgiziledi. О́tinim­der­di qalalar men aýdandardyń ákim­dikteri beredi, al kólemder aýyl sharýa­shylyǵy, kásipkerlik bas­qar­­ma­larymen kelisiledi. Ekin­shi­si – shaǵyn jáne orta bıznes sýbek­ti­lerine 0,01% jeńildikpen nesıe berý. Kásipker belgili bir kezeńde ónimdi belgilengen baǵamen satýǵa min­det­te­nedi. Aınalym dep atalatyn shema boıynsha kókónisterdi satý júrip jatyr, – deıdi ol.

Máýlen О́mirtaev jyl basynan beri shamamen 50 tonna bakaleıa ónimi kóle­minde taýar ıntervensııalary jú­r­gizilgenin aıtady. Al aınalym shemasy boıynsha Qaraǵandyda kásip­ker­lerdiń birimen shart jasalǵan eken. О́nimniń tórt túri boıynsha jalpy kólemi 2 myń tonna anyqtaldy. Atap aıtqanda, kartop – 1 100, sábiz – 400, pııaz – 300, qyryqqabat 200 tonnany quraǵan.

Moınyna jaýapty mindet alǵan kásipker apta saıyn kókónisterdi oblys ortalyǵynyń sýpermarketterine, áleýmettik pavılondarǵa jetkizip oty­rady. «Saryarqa» ÁKK» AQ usynǵan aqparatqa súıensek, ótken jyldyń qazan aıynan bastalǵan jet­ki­zilimder kólemi 500 tonnadan asqan eken.

Qazirgi ýaqytta qany jerge tambaı turǵan taýardyń biri – qant. Endi osy taǵam túrine keler bolsaq, jaqyn arada Azyq-túlik korporasııasynan qosymsha 136 tonna jetkiziledi degen derek bar. Bul partııanyń bir bóligi taýar ıntervensııasyna jiberilýi tıis. Sonymen birge qaraqumyq, ósimdik maıyn jáne kúrishti qosymsha satyp alý da josparda bar. Máselen, qant – Tarazdan, qaraqumyq – Pavlodar oblysynan, ósimdik maıy – Shyǵys Qazaqstan oblysynan, al kúrish bolsa Qyzylordadan jetkizilmek. Iаǵnı bul degen azyq-túlik taýarlarynyń túgeli ózimizdiń elde óndiriledi degen sóz.

Atalǵan taýarlardyń bári «Sary­arqa» ÁKK» AQ-nyń qoıma­la­ryn­da saqtalatyn bolady. Al Máýlen О́mirtaev turaqtandyrý qoryn toltyryp otyrý úshin forvardtyq satyp alý tetigin de paıdalanýdy josparlap otyr­ǵandaryn aıtady.

– Memleket basshysy aýyl sharýa­shy­lyǵy ónimderine qatysty osyndaı tapsyrma bergeni belgili. Bizde bul úshin qarajat jetkilikti. Biz kartop, sábiz, pııaz sekildi kókónis túr­lerin satyp alýǵa kelisim jasaı ala­myz. Baǵany belgilep, ónim jı­nal­ǵannan keıin qajet bolǵan jaǵ­daıda aýylsharýashylyq taýar óndi­rý­shi­lerden ónimdi ala alamyz, – deıdi ol.

Qazirgi tańda «Saryarqa» ÁKK» AQ-nyń oblystyq aýyl sharýashylyǵy basqarmasymen tize qosyp, óńirdegi baǵanyń turaqty bolýyn qamtamasyz etý jolynda, ıaǵnı turǵyndardyń qymbatshylyqtyń qyspaǵynda qalyp qoımaımyz ba degen qorqynyshyn seıiltý baǵytynda mardymdy jumys istep jatqanyn aıta ketken lázim.

 

Qaraǵandy oblysy

Sońǵy jańalyqtar

EQYU Bas hatshysy Qazaqstanǵa keledi

Parlament • Búgin, 09:31

Beısenbige arnalǵan aýa raıy boljamy

Aýa raıy • Búgin, 09:00

Shabyt shaqyratyn shahar

Elorda • Keshe

Aqjaınaq astana

Elorda • Keshe

Ozyq óndiris ornynda boldy

Aımaqtar • Keshe

Dımash pen Djekson

О́ner • Keshe

Uqsas jańalyqtar