«Bıyl 29-30 naýryz kúnderi respýblıkanyń 7 oblysy men 2 qalasynda qatty jeldiń saldarynan birneshe nysan shatyrynyń ushýy (297 jaǵdaı) tirkeldi. Olardyń qatarynda bilim berý, densaýlyq saqtaý, turǵyn úıler, jergilikti bılik jáne quqyq qorǵaý organdary men taǵy basqa nysandar bar. Tótenshe jaǵdaı saldarynan 8 adam, onyń ishinde 3 bala zardap shekti. Olardyń 4-i aýrýhanaǵa jatqyzylyp, qalǵany tekserýden soń úılerine jiberildi», dedi Iýrıı Ilın OKQ-de ótken brıfıngte.
Mınıstrdiń aıtýynsha, qolaısyz aýa raıynyń saldarynan birneshe óńir turǵyndary ýaqytsha qıyndyqqa tap boldy.
«8 oblystyń 289 eldimekeninde aýa raıy qolaısyzdyǵynan bolǵan apat saldarynan elektr jaryǵy óship qaldy. Barlyǵy 110 387 abonent elektr jaryǵynsyz qaldy. Atap aıtqanda Aqmola oblysy– 87, Qaraǵandy oblysy– 25, Almaty oblysy – 83, Atyraý oblysy – 10, Pavlodar oblysy– 70, SQO – 12, Aqtóbe oblysy – 1 jáne Jambyl oblysy – 1. Búgin saǵat 11.00-degi jaǵdaı boıynsha 275 eldimekende elektr jaryǵy qalpyna keltirildi. Degenmen 3 oblystaǵy 14 eldimekende 12 709 abonent áli de bolsa elektr jelisine qosylmaǵan», deıdi ol.
Buǵan deıin atalǵan vedomstvo basshysy úıin sý basqan turǵyndarǵa ótemaqy tólene me degen saýalǵa jaýap berdi.
