Bul týraly Úkimettiń resmı saıty málim etti.
QR Premer-Mınıstri Álıhan Smaıylov TJM basshysy Iýrıı Ilınmen jáne Aqtóbe oblysynyń ákimi O. Orazalınmen, Pavlodar oblysynyń ákimi Á. Sqaqovpen, Batys Qazaqstan oblysynyń ákimi Ǵ. Esqalıevpen jáne Soltústik Qazaqstan oblysynyń ákimi Q. Aqsaqalovpen telefon arqyly sóılesti.
Mınıstr men óńir basshylary eldegi sý tasqyny jaǵdaıy týraly baıandady. TJM basshysynyń habarlaýynsha, búginde Qazaqstanda 227 eldi meken qaýipti aımaqta tur. Sý basýǵa úsh nárse sebep boldy. Bul – qardy ýaqytyly shyǵarmaý, tazartylmaǵan aryqtar men erigen sýlar.
Qazirgi tańda sý basý qaýpi elimizdiń soltústik jáne batys óńirlerinde saqtalyp otyr. Eldi mekenderdi sý tasqynynan qorǵaý maqsatynda 2017 jyly 2021-2023 jyldarǵa arnalǵan sý tasqynyna qarsy is-sharalardyń jol kartasy ázirlenip, bekitildi. Jol kartasy aıasynda 2021 jyly júzege asyrý josparlanǵan 68 is-sharanyń 33-i oryndaldy jáne 4-i merziminen buryn tapsyryldy.
Jalpy elimiz boıynsha sý tasqyny qaýpi bar 1010 eldi mekenniń 285-inde sý basý qaýpi saqtalyp otyr. Bul oraıda 340 eldi mekendi sý basý qaýpi joıylyp, 385 eldi mekende seıildi. Bıylǵy 31 naýryzdaǵy jaǵdaı boıynsha qar jamylǵysynyń aýdany 47%-dy quraıdy.
Bıyl jylynýdyń birinshi tolqyny barysynda ShQO, BQO, Atyraý oblystarynda avtomobıl joldarynyń 3 ýchaskesin sý basý jaǵdaılary tirkeldi. Qalyń qardyń erýine baılanysty bolǵan ekinshi tolqynnyń saldarynan Pavlodar oblysynyń Rojdestvenka aýylyndaǵy eki turǵyn úı, Batys Qazaqstan oblysynyń Shalǵyn aýylyndaǵy 25 úı men 2 áleýmettik nysan (Qoskól kentiniń halqy evakýasııalandy) erigen qar sýynyń astynda qaldy, Aqtóbe jáne Batys Qazaqstan oblystaryndaǵy 3 avtomobıl joly ýchaskelerin sý shaıyp ketti.
О́z kezeginde óńir ákimderi sý basqan aýmaqtardy qalpyna keltirý boıynsha qabyldanyp jatqan sharalar týraly baıandady. QR Premer-Mınıstri Jol kartasyn iske asyrýdy jedeldetýdi, kelip túsken shaǵymdarǵa jedel áreket etýdi, sý basý qaýpin joıýdy tapsyrdy.
Sondaı-aq azamattardyń qaýipsizdigin qamtamasyz etý úshin barlyq sharalardy júzege asyrýǵa erekshe nazar aýdarý qajet. О́ńir basshylary bul máseleni erekshe baqylaýǵa alýy tıis. Esterińizge sala keteıik, bıylǵy 22 aqpanda Úkimet otyrysynda ortalyq jáne jergilikti atqarýshy organdardyń sý tasqyny kezeńine daıyndyq sharalary qaraldy.
QR Premer-Mınıstri Á. Smaıylov ákimdikterge qardy, ásirese, aýyldyq eldi mekenderden shyǵarý, aryqtardy, nóser kárizderin tazartý, ýaqytsha bógetter salý jumystaryn ýaqytyly júrgizý týraly tapsyrma berdi.
