«Jumys berýshilerdiń kóbi áli kúnge deıin qyzmetkerlerden eńbek kitapshasyn, jeke paraq pen ómirbaıandy jazbasha tapsyrýdy talap etedi. Azamattardyń buǵan narazylyq bildirýi oryndy. Mundaı eski tásilderden arylý qajet», dedi Prezıdent Qasym-Jomart Toqaev Ulttyq qoǵamdyq senim keńesiniń VI otyrysynda.
Engizilgen servıs arqyly áleýetti qyzmetkerdiń túıindemesin qaraý jáne ony odan ári resimdeý kezinde jumys berýshi qyzmetkerdiń jeke isin elektrondyq formatta alý úshin Eńbek sharttaryn esepke alýdyń biryńǵaı júıesine (EShEBJ) suraý salýdy júzege asyra alady. Jumys berýshi Eńbek kodeksinde sıpattalǵan sharttar sheńberinde mynadaı kez kelgen aqparatty: jeke kýálik derekterin, fotosýret, bilimi jáne otbasy músheleri týraly aqparat, vaksınalaý, EShEBJ-dan jumys tájirıbesi týraly aqparatty suratýǵa quqyly. Budan basqa, mynadaı elektrondy anyqtamalardy alýǵa bolady:
– sottylyqtyń bolmaýy/bolýy týraly;
– psıhonevrologııalyq, narkologııalyq jáne týberkýlezge qarsy dıspanserlerde esepke alý týraly;
– 0/75ý anyqtama;
– múgedektik týraly anyqtama.
Bul rette jumyskerge sms-habarlama arqyly nemese Elektrondy eńbek bırjasy portalyndaǵy jeke kabınetke áleýetti jumys berýshige óz derekterin usynýǵa suraý keledi. Oń jaýap alǵannan keıin, EShEBJ jeke iske qol jetkizýge múmkindik beredi. Onyń negizinde jumys berýshi qyzmetkerdi jumysqa qabyldaý jáne onymen eńbek shartyn jasasý týraly sheshim qabyldaıdy. Osy jerde elektrondy eńbek shartynyń jobasyn jasaýǵa bolady.
EShEBJ qyzmetkerdiń saýalǵa jaýabyn kúntizbelik 7 kún ishinde kútetinin atap ótken jón. Bas tartylǵan nemese jaýap bolmaǵan jaǵdaıda, jumys berýshige derekterdi usynýdan bas tartylady. Kelisim aqparat suraǵan uıymdaǵy barlyq jumys merzimine jaramdy bolady. Eger kelisim jasalmasa nemese buzylsa, kelisim avtomatty túrde zańsyz bolyp sanalady.
«Elektrondy jeke is» servısi qujattardy qoldan jasaý táýekelin boldyrmaıdy jáne eńbek sharttaryn jasasý kezinde qaǵaz qujattardy usynýdan bas tartý arqyly jumysqa ornalastyrýdy jedeldetýge múmkindik beredi.
Qazirgi ýaqytta jumys berýshiler servısti EEB nemese kásiporyndaǵy kadrlyq eseptiń aqparattyq júıeleri arqyly paıdalana alady. Budan ári bul fýnksıonal ázirlenip jatqan eńbek resýrstary portalynda qoljetimdi bolady.
Qyzmetkerdiń jeke isin usyný servısi sheńberinde EShEBJ Eńbek jáne halyqty áleýmettik qorǵaý, Ádilet, Bilim jáne ǵylym, Densaýlyq saqtaý mınıstrlikteriniń aqparattyq júıelerimen, sondaı-aq Bas prokýratýranyń Quqyqtyq statıstıka jáne arnaıy esepke alý komıtetimen biriktirilgen.
