Jamaýbaev 2022 jylǵa arnalǵan respýblıkalyq bıýdjetti naqtylaý týraly zań jobasyn usyndy.
Memleket basshysynyń tapsyrmalary, baǵdarlamalyq qujattardyń is-sharalary, makroekonomıkalyq kórsetkishterdiń ózgerýine baılanysty shyǵystar, sondaı-aq buryn qabyldanǵan shuǵyl mindettemelerdi iske asyrýǵa arnalǵan qosymsha qarajat eskerildi.
Atalǵan baǵyttar boıynsha bıýdjet shyǵystary 2,7 trln teńgege ulǵaıtyldy.
Bıýdjet shyǵystaryn ulǵaıtý kózderi mynalar bolyp tabylady:
- Bıýdjettiń óz kiristeri - 1,1 trln teńge;
- Ulttyq qordan kepildendirilgen transfertti ulǵaıtý - 1,6 trln teńge.
«Prezıdenttiń tapsyrmalaryn iske asyrýǵa qosymsha 1,8 trln teńge baǵyttalatyn bolady. Atap aıtqanda, jalpy shyǵyny 197 mlrd teńge bolatyn halyqtyń tabysyn arttyrý jónindegi is-sharalardy iske asyrý. Osy qarajat sheńberinde jastardy qoldaý, óz bıznesin ashý úshin mıkrokredıtter berý, jalǵa alynǵan turǵyn úı úshin tólemniń bir bóligin sýbsıdııalaý jáne halyqtyń naqty tabysyn arttyrýǵa baǵyttalǵan basqa da mańyzdy is-sharalar qamtamasyz etiledi. Azyq-túlik qaýipsizdigin qamtamasyz etý jospary sheńberindegi is-sharalarǵa - 238 mlrd teńge. Qosymsha qarajat agroónerkásiptik keshendi sýbsıdııalaýǵa, kóktemgi egis jáne egin jınaý jumystaryna jeńildikpen nesıe berý kólemin ulǵaıtýǵa jáne aýyl sharýashylyǵyndaǵy basqa da máselelerdi sheshýge baǵyttalatyn bolady», dedi Erulan Jamaýbaev.
Sonymen qatar óńirlerdi damytýǵa da 476 mlrd teńge baǵyttaý josparlanǵan. Bul shyǵyndardyń negizgi bóligi 271 mlrd teńge nemese 57% batys jáne ońtústik óńirlerdi damytýǵa baǵyttalǵan.
Tutastaı alǵanda, óńirlerge respýblıkalyq bıýdjetten 5,5 trln-nan astam teńge nemese jalpy shyǵystardyń 29,3%-y baǵyttalatyn bolady.
«Qosymsha qarajat sheńberinde ınflıasııa boıynsha dálizdiń ózgerýine baılanysty áleýmettik tólemderdi ındeksteýge arnalǵan shyǵystar kózdelgen. Bul 110 mlrd teńgeden asady», dep qosty Erulan Jamaýbaev.
