Jaqynda Picodi.com sarapshylary qyzyq taldaý júrgizip, onda ár eldegi azamattardyń 1 mln dollardy qansha jyl jumys istep taba alatynyn zerttep kóripti. Árıne, zertteý barysynda olar ár eldegi ortasha aılyq jalaqyny negizge alǵan. Reıtıngke 102 el kirgen. Ishinde Qazaqstan da bar. Bizdiń eldiń turǵyndary mıllıon dollar jııý úshin 245 jyldan astam ómir súrý kerek eken. Al osynshama qyrýar qarjyny eń qysqa merzimde jınaı alýǵa qabiletti el – Shveısarııa: 13 jyl, 4 aı. Ekinshi orynda 20 jyl, 1 aımen Aýstralııa ornalassa, úzdik úshtikti 20 jyl, 2 aımen Sıngapýr túıindeıdi. Sonymen qatar bestik qatarynda Lıýksembýrg (20 jyl, 4 aı) pen AQSh ta (23 jyl, 1 aı) bar.
245 jas, 11 aımen Qazaqstan 87-pozısııada tur. Bizge kórshiles elder ishinen Reseı (191 jyl, 9 aı), Armenııa (215 jyl, 4 aı) jáne Grýzııa (230 jyl, 2 aı) bizden joǵary ornalassa, Ázerbaıjan (257 jyl, 1 aı) men О́zbekstannyń (318 jyl, 4 aı) múmkindigi Qazaqstannan tómen bolyp shyqty. Al Pákistan, Nıgerııa, Ýganda eliniń azamattaryna mıllıon dollar tabý úshin 400 jyldan astam ýaqyt qajet eken.
Zertteýshiler mindetti jarnalar men salyqtardy eseptemegendegi ortasha aılyq jalaqy kólemin numbeo.com-nan alǵan. Atalǵan resýrsta bizdegi ortasha aılyq jalaqy mólsheri 174 968,29 teńge dep kórsetilgen. Birinshi oryndaǵy Shveısarııadaǵy ortasha aılyq jalaqy 2 956 110,32 teńgege teń. Qansha ese joǵary ekenin aıtpaı-aq qoıaıyq. Álemdegi 32-terrıtorııa, 9 mln-ǵa jeter-jetpes halqy bar, teńizge shyǵar joly joq (tap biz sııaqty), tabıǵı baılyq degennen ada, biraq aýyl sharýashylyǵyn damytý arqyly jahannyń básekege qabiletti úzdik 10 ekonomıkasynyń qataryna kirip otyrǵan, 50,1 mlrd dollardyń ónimin ımporttap, alaıda ózi 303,886 mlrd dollardyń taýaryn eksportqa shyǵaryp otyrǵan (2018 jylǵy derek) Shveısarııa bizge qaı turǵydan da úlgi bolýǵa laıyq el. Bajaılap qarar bolsaq, múmkindigimiz ben baılyǵymyz Alpi etegindegi eldi on emes-aý, júz orap alar, biraq mol múmkindik pen esil baılyqtyń esebi kórinbeıdi, halyqtyń baılyǵy halyqqa buıyrmaıdy. Mundaıda, árıne, mıllıon dollar jınaý týraly áńgime aıtýdyń ózi kúıinishti.
