«Qurmetti dostar!
Sizdermen bóliser jaqsy jańalyǵym bar.
Búginnen bastap elimizdiń eń iri konserttik uıymy – «Roza Baǵlanova atyndaǵy «Qazaqkonsert» memlekettik konserttik uıymynyń basshysy qyzmetine kiristim.
О́zderińiz biletindeı, 60 jyldyq tarıhy bar bul uıym – qazaq mýzykalyq óneriniń qara shańyraǵyna aınalǵan úlken mekemelerdiń biri. 2016 jyldan beri uıymnyń bas keńsesi elordadaǵy «Qazaqstan» ortalyq konsert zalynda ornalasqan. 2021 jyly uıymǵa KSRO jáne Qazaqstannyń halyq ártisi, Halyq qaharmany Roza Baǵlanovanyń esimi berildi.
Qazaqkonsert uıymynda elimizdiń úzdik ártisteri men shyǵarmashylyq ujymdary bas qosqan. Qazaqkonsertte barlyq mýzykalyq ónerdiń janrlary usynylǵan: folklor, klassıka, estrada, mıýzıkl teatry.
Aldaǵy ýaqytta osy konserttik uıymnyń jáne qazaq mýzyka óneriniń órkendeýine óz úlesimdi qosyp, «Halyq únine qulaq asatyn memleket» tujyrymdamasyna sáıkes halyq pen mádenıettiń arasynda tikeleı dıalog ornatyp, Jańa Qazaqstandy qurýǵa óz kúshimdi salamyn. Jalpy, mýzyka ónerin halyqqa qoljetimdi etip, mádenıetti nasıhattap júrgen «Qazaqkonsert» uıymy men úshin jat orta emes. Sondyqtan mádenıet salasyndaǵy uzaq jylǵy tájirıbem de, shyǵarmashylyq qabiletim de osy maqsattyń júzege asyrylýyna baǵyttalady», delingen eks-mınıstrdiń habarlamasynda.
