2021 jyly 5 jeltoqsanda bastalǵan fýtzaldan BAQ liga chempıonaty bıyl «Qazaq radıosynyń» 100 jyldyq mereıtoıyna arnalǵan bolatyn. Ár jeksenbi saıyn elorda jýrnalısteriniń basyn qosqan BAQ liga chempıonaty «A» jáne «V» lıgalaryna bólindi. Chempıonnyń taǵdyry sońǵy týrǵa deıin belgisiz bolyp, bas júldeni «7 arna» komandasy men «Qazmedıa» ortalyǵy sarapqa saldy. Nátıjesinde, chempıondyq oıyn «Qazmedıanyń» paıdasyna sheshilip, 4:1 esebimen jeńgen olar tuńǵysh ret BAQ liga chempıony atandy. 2-oryn «7 arnaǵa» buıyrsa, «National Geographic Qazaqstan» komandasy úzdik úshtikti túıindedi. Al «V» lıgasynda «Eýrazııa+ORT» komandasy jeńimpaz atanyp, Aqparat jáne qoǵamdyq damý mınıstrliginiń ujymy kúmispen kúpteldi. Úshinshi oryn «Kazaknews.kz» komandasyna buıyrdy.
Sondaı-aq úzdik oıynshylar da marapattaldy. Komanda kapıtandary arasyndaǵy daýys berý nátıjesinde «Qazmedıa» oıynshysy Azat Qumarbek «A» lıgasynyń, «V» lıgasynda «Eýrazııa» birinshi arnasynyń qyzmetkeri Jandos Manashev úzdik dep tanyldy. Al byltyrdan bastap taǵaıyndalǵan Amangeldi Seıithan atyndaǵy arnaıy júlde bıyl «Habar 24» redaktory, «Qazmedıa» qaqpashysy Qanat Bazylhanǵa buıyrdy.
Marapattaý rásimine Parlament Senatynyń depýtaty Nurtóre Júsip, Parlament Májilisiniń depýtaty Janarbek Áshimjan, «7 arna» bas dırektory Erlan Igisinov, «Qazaq radıolary» JShS-nyń bas dırektory Ernur Býrahan, Memlekettik hatshylyǵy meńgerýshisiniń orynbasary Erjan Baıtiles jáne «Habar» agenttigi AQ basqarma tóraǵasy Berik Ýálı qatysty.
Aıta keteıik, baıraǵyn 2016 jyldyń 10 jeltoqsanynda jelbiretken BAQ liga – Qazaqstan BAQ ókilderiniń basyn biriktirip, redaksııalar arasynda kópir ornatyp, áriptestik tatýlyqty arttyrýǵa baǵyttalǵan joba. Bes jyldyń ishinde BAQ liga aıasynda BAQ ókilderi arasynda 10 fýtbol maýsymy, 2 voleıbol maýsymy ótip, oǵan barlyǵy 70-ten astam redaksııadan 1000-ǵa jýyq BAQ qyzmetkeri qatysty.
Endi BAQ lıganyń shaǵyn fýtboldan jazǵy chempıonaty mamyr aıynda bastalady.
