Qoǵam • 08 Sáýir, 2022

Torǵyndy eshkim izdegen joq

59 ret kórsetildi

Bizdiń aýyldaǵylar telefondy eń alǵash ret Torǵyn deıtin qyzdyń qolynan kórdi. Toqsanynshy jyldardyń basynda bizdiń shaǵyn aýyldyń turǵyndary telefon ustaǵan adamdy mártebesi bıik nemese áldebir shendiniń biri dep oılaıtyn. Sol jazda aýyldyń áńgimesiniń tuzdyǵy Torǵyn jáne onyń telefony boldy. О́ıtkeni Torǵyn ógizben sýǵa bara jatsa da, mal qaıyryp júrgen ákesine ilesip óriste júrse de, qolynan «jańa zatyn» tastamaıtyn. Tipti keıde tóbeniń basyna shyǵyp alyp, áldekimdermen uzaq-uzaq sóılesetin. Jaı sóılesip qana qoımaı, turǵan ornynda aınala beretin, aınala beretin. Muny kórgen úlkender jaǵy «qursyn, telefon degen adamnyń basyn aınaldyryp jiberetin zat eken» degen qaýeset taratyp ta jiberdi. Ortalyqtaǵy qalada oqıtyn Torǵynnyń telefonyna qyzyqqan jastar oǵan keleside aýylǵa oralǵanda bir-bir telefon ákelip berseńiz degen ótinishterin aıtyp, aqysyna bir qoıdan beretin bolyp kelisedi. Myńǵyrtyp qoı aıdap júrgender úshin bir qoı degen ne táıiri? Olarǵa qyzyǵy bir-bir telefon alyp, ár tóbeniń basynda aınalsoqtap júrý. Sonda ǵana eldiń nazary ózderine aýady dep oılasa kerek.

Kúz aıy kelip, Torǵyn qalaǵa attandy. Ony bul ret búkil aýyl bolyp attandyrdy. Bar oılaǵandary – tezirek oralyp, ózderi kútken telefondaryn ákelse degen izgi oı. Aıadaı aýyl turǵyndarynyń endigi ómiri kútýmen ótip jatty. «Torǵyn qazanda keledi eken», «Oıbaı, qarashada kelemin depti», «Joq, qysqy demalys­ta keledi eken, ákesi aıtty» degen ártúrli joramaldar aýyl arasyn sharlap júrdi. Tipti qoıshylar telefonyn qolyna alǵan soń, kimmen sóılesetinin, qaı tóbeniń basyna shyǵyp, ary-beri aınalatynyn da oısha josparlap, ishterine syımaı ketse, bir-birine aıtyp ta júrdi. Sol jylǵy qysty bizdiń aýyldaǵydaı saǵyna kútken eshkim joq shyǵar?! Jaıshylyqta, «qys qashan keter?» dep nalıtyndar, endi «qys tezirek kelse eken» desetin boldy.

Mine, qys ta keldi. Torǵyn aýylǵa oralmady. Bir qoıdan berip satyp almaq bolǵan telefondar da joq. Jurt ań-tań. «Torǵyn nege kelmeı jatyr?» dep bir-birinen suraıdy. Sabyry taýsylǵan bireýi onyń ákesine baryp, mán-jaıdy bilmek boldy. Olar da qaladaǵy qyzynan habar ala almapty. Birneshe kúnnen keıin Orazbaı qarttyń úıine aýyl arasyna atpen hat jetkizetin poshtashy at basyn burdy. Qolynda alaqandaı aq konvert. Áldenege tańyrqap qalǵan Orazbaı qart asyǵys konvertti jyrtyp, oqı bastady. «Qadirli Orazbaı Imanuly, sizge ýnıversıtet atynan habarlasyp otyrmyz. Qyzyńyz Torǵyn 1996 jyly 23 jeltoqsan kúni áldekimmen telefonda sóılesken soń ushty-kúıli joǵalǵan. Apta boıy izdep tappadyq. Aýylǵa barǵan joq pa? Eger barsa, qaıtara hat jiberersizder».

Aýyldaǵylar endi áli qo­lyna ustamaǵan telefondaryn emes, Torǵyndy izdeýge kiristi. «Qaıda ketti?», «Sol kúni kimmen sóılesti eken?», degen suraqtar olardy mazalaı bastady. Úlkender jaǵy «aıttyq qoı, telefon degen adamnyń basyn aınaldyryp jiberedi» degen sózderin osy joly taǵy da alǵa tartty. Bul sózge bári sengendeı boldy. Aýnap aılar, jyljyp jyldar ótti. Torǵyn sol kúıi tabylmady, aýylǵa oralǵan joq. Eshkim de ony izdemeıtin de boldy. Anda-sanda aýylǵa barǵanda, anadaıda turǵan tóbelerdi kóremin. Eshkimniń kózine kórinbeı Torǵyn sol arada aınalsoqtap júrgendeı elesteıdi. 

Sońǵy jańalyqtar

Muhtar men Qaıym

Qazaqstan • Keshe

Elde qylmys azaıǵan

Qoǵam • Keshe

Aqań jáne qazaq radıocy

Ahmet Baıtursynuly • Keshe

Qaıratkerdiń batyl qadamy

Rýhanııat • Keshe

Rýhty jyrdyń ıesi

Ádebıet • Keshe

Astanadaǵy asa iri jarys

Tennıs • Keshe

Uqsas jańalyqtar