Eýroparlament ókilderi aldymen «Ál-Farabı» mýzeıin aralap, qara shańyraq tarıhyna qanyqty. Sonymen qatar qonaqtarǵa QazUÝ janyndaǵy Pan Gı Mýn ınstıtýtynyń qyzmeti baıandalyp, oqý ornynyń damý jospary tanystyryldy.
Delegasııa quramyna «Qazaqstan Respýblıkasy – Eýropalyq odaq» Parlamenttik yntymaqtastyq komıtetindegi Eýropalyq Parlament delegasııasynyń tóraǵasy, Kólik jáne týrızm komıtetiniń 3-shi vıse-tóraǵasy Andrıs Amerıks (Latvııa), elshi, QR EO ókildiginiń basshysy Kestýtıs Iаnkaýskas, QR-EO Parlamenttik yntymaqtastyq komıtetindegi Eýropalyq Parlament delegasııasynyń múshesi, EP Syrtqy ister komıtetiniń múshesi Fransısko Mıllan-Mon (Ispanııa) jáne basqa da uıym músheleri kirdi.
QazUÝ-dyń Basqarma Tóraǵasy – Rektor Janseıit Túımebaev qonaqtarǵa arnap sóz sóıledi. Ol 2010 jyldan bastap Qazaqstan Bolon prosesiniń tolyqqandy múshesi jáne Joǵary bilimniń eýropalyq keńistiginiń qatysýshysy mártebesine ıe ekenin atap ótti. Qazirgi ýaqytta ol Bolon prosesiniń baqylaý tobynyń teń tóraǵasy bolyp sanalady. QazUÝ álemniń 500-den astam úzdik jáne jetekshi ýnıversıtetterimen yntymaqtastyqta, kóptegen iri halyqaralyq uıymdardyń quramyna kiredi jáne bilim berý baǵdarlamalary men ǵylymı baǵyttarynyń aýqymy asa keń. 16 qosdıplomdy bilim berý baǵdarlamasy Eýroodaqqa múshe 10 eldiń joǵary oqý oryndarymen birlesip iske asyrylýda. QazUÝ-dyń segiz fakýlteti Eýroodaq elderiniń 13 seriktes joǵary oqý ornymen yntymaqtastyq ornatqan. Ýnıversıtette 92 bilim berý baǵdarlamasy aǵylshyn tilinde oqytylady.
Qara shańyraq Birikken Ulttar Uıymynyń «Akademııalyq yqpal etý» baǵdarlamasynyń turaqtylyq jónindegi jahandyq haby retinde maqsatty túrde jumys istep, oqytýshy-professorlar qyzmetin ınternasıonaldandyrý jolymen ǵylymı-bilim berý baǵdarlamalarynyń deńgeıin arttyrýda.
QazUÝ-da jekelegen eýropalyq eldermen yntymaqtastyq jónindegi ortalyqtar tabysty jumys isteýde.
Rektor sóz sońynda: «Biz Qazaqstannyń Eýropalyq odaqpen halyqaralyq mádenı-bilim berý yntymaqtastyǵyn ıntegrasııalaý jáne damytýǵa asa múddelimiz. Osylaısha QazUÝ eýropalyq eldermen ǵylymı zertteýlerdi damytý salasyndaǵy yntymaqtastyqqa óz úlesin qosady», dep bul kezdesýdiń ózara yqpaldastyqty nyǵaıta túserine zor senim bildirdi.
О́z kezeginde QR-EO Parlamenttik yntymaqtastyq komıtetindegi Eýropalyq Parlament delegasııasynyń birinshi vıse-tóraǵasy, EP Kólik jáne týrızm komıtetiniń 3-shi vıse-tóraǵasy Andrıs Amerıks: «Biz ártúrli elderden keldik, biraq bárimiz eýropalyqpyz. Biz birlikten ártúrlilikke deıingi biregeı prosesterdi birge ótkizýdemiz, ortaq biregeılikke ıemiz. Biz eýropalyq ulttardyń tereń tarıhymen bólisip, Eýroodaq qaǵıdalaryn Qazaqstanǵa jetkizý úshin keldik. Kúrdeli geosaıası ahýalǵa qaramastan, negizgi qıyndyqtardy eńsere alǵan elge barlyq jaqsylyqty tilegimiz keldi. Sizderdiń elderińiz azamattyq qoǵamda mańyzdy ról atqaratyn mádenıetaralyq dıalog pen adam quqyqtaryn qoldaýǵa septigin tıgizedi dep úmittenemiz», dep pikir bildirdi.
QR-EO Parlamenttik yntymaqtastyq komıtetindegi Eýroparlament delegasııasynyń múshesi Fransısko Mıllan-Mon jınalǵandarǵa, ásirese jastarǵa Eýroparlament qyzmetine qyzyǵýshylyq tanytqany úshin alǵysyn bildirdi. Ol óz sózinde Qazaqstan Respýblıkasynyń Prezıdenti Q.Toqaev bastaǵan reformalardyń der kezinde qabyldanǵanyna toqtala kele, QazUÝ jetistikterin joǵary baǵalady.
«Ýnıversıtet shyǵystyń uly ustazy Ál-Farabı murasyn saqtaı bildi, sonymen birge bolashaqqa senimmen qaraıdy, sıfrlandyrý jumystaryn júrgizýde. Siz halyqaralyq ýnıversıtettermen tyǵyz baılanys ornyqqany týraly, eýropalyq órkenıet qaǵıdalary men BUU qundylyqtary jaıynda baıandadyńyz. Ortalyq Azııada ǵana emes, sonymen qatar Eýroodaq elderine de tanymal ýnıversıtetke tolaǵaı tabystar tileımin», degen lebizin jetkizdi.
Sondaı-aq júzdesýge Parlament Májilisiniń Halyqaralyq ister, qorǵanys jáne qaýipsizdik komıtetiniń tóraıymy Aıgúl Quspan qatysyp, Eýroodaq jumysyna kórsetken qyzyǵýshylyq úshin alǵysyn jetkizdi.
Kezdesý barysynda stýdent jastar suraqtar qoıyp, delegasııa múshelerinen tushymdy jaýaptar aldy. Qatysýshylar ózara yqpaldastyqtyń perspektıvalyq baǵyttary týraly oı bólisip, yntymaqtastyqtyń mańyzdy máseleleri boıynsha pikir almasty.
