Muhtar Qul-Muhammed óz sózinde Qazaqstan dástúrli túrde EQYU-men is júzindegi yntymaqtastyqqa zor mán beretinin atap ótti. Ol Memleket basshysy Qasym-Jomart Toqaevtyń bastamasy boıynsha azamattardyń negizgi quqyqtaryn qorǵaý men Konstıtýsııa erejeleriniń qatań saqtalýyna erekshe nazar aýdarylyp otyrǵanyn atap ótti.
«Prezıdent taıaý bolashaqta ekinshi respýblıkany qurý jónindegi jańa maqsat belgiledi. Bul qoǵamdy túletýdiń aýqymdy úrdisi. Memleketti basqarýǵa azamattardyń qatysýyn keńeıtýge, jańa saıası mádenıetti qalyptastyrýǵa basa nazar aýdarylyp otyr. Biz Qazaqstannyń ornyqty damýdy ilgeriletý, qolaıly ınvestısııalyq ahýal jáne zań ústemdigin, adam quqyqtaryn nyǵaıtý jónindegi bastamalaryn qoldaǵany úshin EQYU-nyń Nur-Sultandaǵy baǵdarlamalar keńsesine alǵysymyzdy bildiremiz», dedi senator Qul-Muhammed.
Folker Frobart óz kezeginde Qazaqstannyń EQYU-ǵa degen senimin joǵary baǵalady, sondaı-aq BUU-nyń Ornyqty damý maqsattaryna qol jetkizýge oraı jergilikti memlekettik basqarý men ózin-ózi basqarýdy damytý jóninde zańnamalyq aktilerdi ázirleýge járdem kórsetýge daıyn ekenin bildirdi.
Taraptar Ornyqty damý maqsattary men depýtattyq korpýstyń belsendi túrde atsalysýyna qatysty taqyryptardy talqylady. Muhtar Qul-Muhammed Qazaqstan EQYU Parlamenttik Assambleıasy qararynyń jobasyn ázirleýdi josparlap otyrǵanyn, onda EQYU-ǵa múshe elderdiń 2030 jylǵa deıingi kezeńge damý salasyndaǵy mindettemelerdi oryndaýy jáne ODM iske asyrýdyń mańyzyna basa nazar aýdarylatynyn atap ótti.
Qatysýshylar kezdesý qorytyndysy boıynsha qaýipsizdik sektoryn reformalaýdy, kóshi-qondy basqarýdy, energııanyń taza túrlerine kóshýdi jáne klımattyq, ekologııalyq daǵdarystarmen kúreske qosa ornyqty damý maqsattaryna qol jetkizýdi jaqsartýǵa yqpal etetin qujatty birlesip ázirleý jóninde ýaǵdalasty.
