Kollajdy jasaǵan Qonysbaı ShEJIMBAI, «EQ»
AQSh bıligi sanksııaǵa ushyraǵan qazaqstandyq «Sberbank» pen Sberbank Europe AG-ǵa operasııalardy aıaqtaý úshin úsh aı mursat berip otyr. OFAC (AQSh sheteldik aktıvterdi baqylaý basqarmasy – red) jarııalaǵan bas lısenzııa 2022 jyldyń 12 shildesine deıin Reseı «Sberbankiniń» enshiles uıymdarymen operasııalardy qysqartýǵa múmkindik beredi. Al «Sberbanktiń» ózi jáne onyń ózge de bólimderimen operasııalar OFAC lısenzııasyna sáıkes 13 sáýirge deıingi támam bolýy tıis. Sonymen qatar Sberbank CIB USA úshin de arnaıy lısenzııa bar. Ol boıynsha kelisimderdi aıaqtaýǵa 7 maýsymǵa deıin ýaqyt bar.
AQSh 6 sáýir kúni «Sberbankke» qatysty buǵattaý sanksııalaryn engizgen edi. Sanksııa aıasynda banktiń AQSh-taǵy aktıvterine shekteý qoıylady. Sondaı-aq amerıkalyq azamattar bul bank arqyly eshqandaı operasııalardy júzege asyra almaıdy.
Árıne, reseılik bankterdiń shaıqalýy onyń klıentterin de beı-jaı qaldyrmaıdy. Qarjy naryǵyn retteý jáne damytý agenttiginiń habarlaýynsha, qazirdiń ózinde qazaqstandyqtar atalǵan úsh bankten 1,82 trln teńgesin qaıtaryp alǵan. Klıentterdiń jappaı teris aınalýy jáne dúrkin-dúrkin soqqan sanksııa bank qyzmetine de keri áser etedi. Tipti «Alfa-Bank» jańa aksıoner izdeıtinin málimdedi. Banktiń basqarýshy dırektory Andreı Tımchenkonyń aıtýynsha, birqatar banktermen «Alfa-Bankti» satý máselesi boıynsha kelissóz júrip jatyr.
«Bank aksıonerin aýystyrý máselesi boıynsha birqatar ınvestormen kelissóz júrgizip jatyrmyz. 10-nan astam ınvestor bizdiń qarjylyq esebimiz ben qujattarymyzdy qarap jatyr. Aldaǵy birer kúnde nemese apta kóleminde jańa aksıonermen kelisimge kelemiz dep senemin», dedi A.Tımchenko.
Sonymen birge bank 100 mlrd teńge kólemindegi nesıe portfelin de satýdy josparlap otyrǵan kórinedi. Ulttyq banktiń málimeti boıynsha, qazir banktiń aktıvi 908,6 mlrd teńge kóleminde. Al qaryz portfeli – 564,3 mlrd teńge.
Úsh enshiles reseılik bankterdegi klıentter depozıtteriniń bank júıesiniń jalpy depozıttik portfelindegi úlesi bıyl jyl basynan beri 14,1-den 6,1 paıyzǵa deıin tómendegen. Soǵan qaramastan Qarjy naryǵyn retteý jáne damytý agenttigi bylaı jubatady: «Qazir reseılik enshiles bankterde tıisti quraldar men ótimdilik potensıaly bar. Bank klıentteri úshin alańdaýǵa negiz joq. Turaqty rejimde bank qyzmetterin úzdiksiz kórsetý úshin olarda barlyq múmkindik bar. Sonyń ishinde klıentter aqshasyn aýdarý jáne tólemder boıynsha tapsyrmalardy óz ýaqytynda oryndaı alady».
Al kúndelikti ómirde de, áleýmettik jelide azamattar atalǵan úsh bankte keıbir operasııalardy oryndaı almaı jatqanyn aıtyp shaǵym bildirýde. Resmı agenttik qansha jerden enshiles bankterdi qorǵashtaı sóılegenimen, onysy shyndyqqa janasa qoımasy sát sanap aıqyndalyp kele jatqandaı. Ony bylaı qoıǵanda, tipti Reseı men Belarýs azamattary qazaqstandyq ekinshi deńgeıli bankterden shot asha bastaǵan degen aqparat bar.
«2022 jyldyń 24 aqpanynan beri Reseı jáne Belarýs rezıdentteri – jeke tulǵalar úshin qazaqstandyq bankterde 11 940 shot ashyldy. Onyń 10 725-i ótinish berýshiniń óziniń jáne qazaqstandyq banktegi senimdi ókiliniń qatysýymen, 1 215 shot qashyqtan ashylǵan. Nátıjesinde, Qazaqstan Respýblıkasynyń bankterinde shot ashqan atalǵan elder azamattarynyń sany 162 myńǵa jetti», dep málimdeıdi Qarjy naryǵyn retteý jáne damytý agenttigi.
Al jyl bastalǵaly 7 reseılik kompanııanyń shoty ashylypty. Jalpy alǵanda, qazaqstandyq bankterde shoty bar reseılik uıymdar sany 805-ke jetken.
