«Tergeý men sottarda zańdylyqty qamtamasyz etý boıynsha prokýratýra organdary jumysynyń negizgi aspektilerine toqtap ketsem deımin. Memleket basshysy qylmystyq orbıtaǵa tartylǵan adam quqyqtaryn qorǵaýdy kúsheıtýge turaqty nazar aýdaryp keledi. Prezıdenttiń tapsyrmasymen 2020 jyldan beri qylmystyq proseske kezeń-kezeńmen úsh býyndy model engizý bastaldy. Bundaı tájirıbeni biz EYDU elderinen alyp otyrmyz. Onyń negizgi mazmuny – polısııa, prokýratýra jáne sot arasynda ókilettikterdi naqty bólý. Bul tártip boıynsha polısııa aıǵaqtardy jınap, olardy bekitedi. Prokýror mańyzdy sheshimderdi qabyldaýǵa kelisim beredi jáne isti sotqa joldaıdy. Sot bolsa baqylaý jasaıdy, úkim shyǵarady jáne jaza belgileıdi», dedi Shyndalıev Ortalyq kommýnıkasııalar qyzmetinde.
Osy oraıda ol jańa modeldiń birinshi kezeńi 2020 jyly engizilgenin eske saldy. Osy model boıynsha prokýror tergeýdiń negizgi sheshimderine kelisim beredi. Bul – adamdy kúdikti dep taný, onyń jasaǵan áreketin saralaý, isti toqtatý nemese qysqartý jáne basqa sheshimder. Olardy prokýror maquldamasa tergeý sheshimderiniń zańdy kúshi bolmaıdy.
«Qylmystyq-prosestik kodekste kelisim berý merzimderi jáne onyń barlyq prosedýralyq tustary naqty jazyldy. Kelisim berý prosesi «Sotqa deıingi tergep-tekserýdiń biryńǵaı tizilimi» (ERDR) arqyly elektrondy túrde onlaın formatta ótkiziledi. Tergeýshi ázirlegen boıda qaýly elektrondyq júıede birden prokýrorǵa túsedi. Eger sheshim zańdy bolsa, prokýror oǵan sıfrly qol qoıyp, sol sátte ony tergeýshige qaıtarady. Jańa modeldi engizgen ýaqyttan beri prokýror fıltri arqyly 500 myńnan astam tergeý sheshimi ótti. Nátıjesi oıdaǵydaı. Tergeý sapasy jaqsaryp, zańsyz sheshimder sany azaıdy», dedi Bas prokýrordyń orynbasary.
