Búgin Qazaqstan Premer-Mınıstri Álıhan Smaıylov «EKO-kýltýra» agroónerkásip holdınginiń prezıdenti Aleksandr Rýdakovpen kezdesti. Kásipker Túrkistan oblysyndaǵy aýdany 500 ga bolatyn jylyjaı kesheni qurylysynyń jobasyn tanystyrdy. Investısııalyq joba 8 myńnan astam jumys ornyn qurýdy kózdeıdi. Bes jylda iske asyrý josparlanǵan. Úkimet basshysy TMD keńistigi aıasyndaǵy jobanyń biregeıligin atap ótti.
«Agroónerkásiptik keshen – aýyl sharýashylyǵy ónimderine suranys pen baǵanyń ósýin esepke alsaq, odan ári damý áleýeti zor mańyzdy sala. Osyndaı iri jobany júzege asyrý biz úshin erekshe mańyzǵa ıe», dedi Álıhan Smaıylov.
Aıta keteıik, «EKO-kýltýra» agroónerkásip holdıngi 2012 jyldan beri jumys isteıdi. Kompanııa qyzmetiniń negizgi túri — óndiristik sıkli jyl boıy jalǵasatyn jabyq topyraqta kókónis ósirý. AО́H quramyna Reseıdiń birneshe oblysyndaǵy jumys istep turǵan jylyjaı keshenderi kiredi.
«Ońtústik Qazaqstan – klımattyq jaǵdaılary men eńbek resýrstary boıynsha taptyrmas jer. Bul jobany júzege asyrý úshin biz Túrkistan oblysyna kezdeısoq nazar aýdarǵan joqpyz. Munda aýa raıy qolaıly, sonyń arqasynda qys mezgilin plenkaly jylyjaılarda ótkizýge bolady. Bul 500 ga jylyjaı klasteri bolady, onda kókónisterdi ǵana emes, kók shópti, jıdekterdi de ósiretin bolamyz», dedi A. Rýdakov.
Sondaı-aq agroholdıng basshysy joǵary sınergetıkalyq nátıje úshin jergilikti fermerlerge agronomııalyq qoldaý kórsetýge, sondaı-aq tıisti kadrlardy daıarlaý boıynsha oqý ortalyǵyn qurýǵa nıet bildirdi. Kezdesý qorytyndysy boıynsha taraptar ınjenerlik ınfraqurylymdy júrgizý, ınvestısııalyq sýbsıdııalar jáne jobany qarjylandyrýǵa qatysty máselelerdi muqııat pysyqtaýǵa kelisti.
