Irikteý kezeńiniń jerebesi boıynsha jarysty Iýlııa Pýtınseva men álemniń burynǵy birinshi raketkasy, «Úlken dýlyǵa» týrnıriniń úsh dúrkin chempıony, Rıo Olımpıadasynyń kúmis júldegeri Anjelıka Kerber bastap berdi. Eki tennısshi de buǵan deıin bir-birimen eki ret kezdesip, ekeýinde de A.Kerberdiń mereıi ústem bolǵan. Kezinde áıelder arasyndaǵy álemdik reıtıngte kósh bastaǵan Kerber 2018 jyly Lıýksembýrgte ótken týrnırde Iý.Pýtınsevamen alǵash ret kezdesip, eki sette 6:3, 6:1 esebimen jeńiske jetse, araǵa jyl salyp ekeýi 2019 jyly Indıan-Ýellste qaıta jolyqty. Jerlesimiz bul joly da nemis qyzyna esh qarsylyq kórsete almady – 6:0, 6:2. Al elordadaǵy úshinshi kezdesýde Iýlııa Pýtınseva óz jankúıerleriniń aldynda Kerberdi tize búktirip, eki jeńilistiń esesin qaıtardy.
Kezdesýdiń birinshi partııasyn qarsylastar breık almasýmen bastady. Sodan keıin Kerber qarqynyn arttyryp, «á» degennen esepti 5:1-ge jetkizdi. Keıingi eki geımde Iý.Pýtınseva breık jasaǵanymen, odan árige shamasy jetpedi – 6:3. Esesine ekinshi sette jerlesimiz tamasha oıyn kórsetip, birinshi settegi qarsylasynyń nátıjesin qaıtalady. Tablodaǵy esep 1:1 bolǵan mezette Iýlııa breık jasaı bildi. Taǵy bir breıkpen óziniń geımin de aldy – 5:1. Budan soń Anjelıka esepti qysqartqanymen, qazaqstandyq tennısshi setti taǵy bir breıkpen támamdady – 6:3. Úshinshi, sheshýshi sette Pýtınseva qatarynan úsh geımde jeńiske jetip, 3:0 esebimen alǵa ketti. Ári qaraı da oıyndy óz baqylaýynda ustaǵan qazaqstandyq tennısshi segizinshi geımde breık jasap, oıynnyń núktesin qoıdy – 6:2. Osylaısha, alǵashqy kezdesýden keıin Qazaqstan quramasy 1:0 esebimen alǵa shyqty.
Ulttyq qurama sapynda 15-shi jeńisine qol jetkizgen Iýlııa Pýtınseva qazaqstandyq tennısshiler arasynda eń kóp jeńiske jetken sportshy atanyp, rekord jańartty. Buǵan deıingi rekord Qazaqstan áıelder quramasynyń qazirgi kapıtany Iаroslava Shvedova men Zarına Dıasqa tıesili edi. Olar búginge deıin ulttyq qurama sapynda 14 márte jeńiske jetken bolatyn. Iýlııa Bıllı Djın Kıng dodasynda 2014 jyldan beri óner kórsetip keledi.
– Birinshi bolyp synǵa túsý qashanda qıyn. Bastapqyda abyrjyǵandyqtan, óz-ózime kele almadym. Birinshi settiń sońynda soqqyny seziný kerektigin túsindim. Sosyn Anjelıkanyń osal tusyn tabýǵa tyrystym. Ashyq qalǵan jerlerdi kózdep, ony kóbirek júgirtýdi oıladym. Bul taktıkam júzege asty. Mundaı matchta árbir upaı mańyzdy. Erteńgi oıynda da barymyzdy salamyz», dedi Iý.Pýtınseva matchtan keıin.
Pýtınseva-Kerber kezdesýi aıaqtalǵan soń kortqa Qazaqstannyń birinshi raketkasy Elena Rybakına men germanııalyq Laýra Zıgemýnd shyqty. 2019 jyly AQSh-taǵy jarystarda E.Rybakına qarsylasyn eki márte jeńse, 2021 jyly germanııalyq tennısshi Dohada bir márte Elenaǵa ese qaıtarǵan edi.
E.Rybakına úshin Laýra Zıgemýndpen ótken bul jolǵy match óz karerasyndaǵy asa jeńil kezdesýdiń biri boldy desek, qatelespeıtin shyǵarmyz. 34 jastaǵy L.Zıgemýnd Germanııa quramasyndaǵy asa tájirıbeli tennısshiniń biri bolsa da, otandasymyzǵa tek bir geımde ǵana qarsylyq kórsete aldy. Elena birinshi partııada qarsylasyna birde-bir geım bermeı, 22 mınýtta 6:0 esebimen jeńiske jetti. Al ekinshi setti germanııalyq sportshy breıkpen bastaǵanymen, Elena lezde tarazy basyn teńestirip ketti. Keıinnen qatarynan bes geımde ústemdik tanytqan jerlesimiz 6:1 esebimen oıyndy aıaqtady. Sóıtip, birinshi kúngi eki kezdesýde de jeńiske jetken Qazaqstan quramasynyń tennısshileri 2:0 esebimen alǵa shyqty.
– Jankúıerler tablodaǵy esepti kórip, oıyn ońaı boldy dep oılaıtyn shyǵar. Biraq óz elimde, jankúıerlerimizdiń aldynda birinshi ret oınaǵan soń azdap qobaljý boldy. Dese de, búgin sport keshenine jınalǵan jankúıerlerge jaqsy oıyn kórsete aldym dep oılaımyn. Árıne, Laýra jaraqatynan aıyǵyp, kortqa endi oralǵandyqtan, ol kúshin tolyq kórsete almaǵan bolýy kerek. Iýlııa Pýtınseva men Anjelıka Kerberdiń oıynyn kóre almadym. Biraq Kerberdiń qalaı oınaıtynyn jaqsy bilemin. Biz áli kúnge deıin kortta kezdespegenbiz, áıtkenmen birge jattyǵyp júrdik. Erteń jeńiske jetip, qazaqstandyq tennıs jankúıerlerin qýantýǵa tyrysamyn, – dedi E.Rybakına.
Ertesi kúni kortqa Qazaqstan men Germanııanyń birinshi raketkalary Elena Rybakına men Anjelıka Kerber shyqty. О́z eliniń úzdik tennısshileri arasynda ótken oıynnyń birinshi partııasynda tarazy basy jetinshi geımge deıin teńselip turdy. Jetinshi geımde germanııalyq tennısshi breık jasap, esepte alǵa shyqty – 4:3. Osy qarqynyn joǵaltpaǵan A.Kerber birinshi partııada jeńiske jetti – 6:4. Ekinshi sette Kerberdiń qateliginen keıin Rybakına esepte alǵa shyǵyp qana qoımaı, bul partııany óz enshisine jazdy – 6:3. Úshinshi, sheshýshi sette de qarsylastar uzaq ýaqyt bir-biriniń osal tusyn taba almaı, jetinshi geımge deıin teń oınady – 3:3. Segizinshi geımde Kerber matchqa dop bergende Rybakına breık jasap alǵa shyqsa, keıingi eki geımde de qatesiz oınap, 7:5 esebimen qarsylasynan jeńisti julyp aldy. Elena Rybakına men Iýlııa Pýtınsevanyń tamasha jeńisterinen keıin Qazaqstan quramasy tarıhta birinshi ret Bıllı Djın Kıng kýbogynyń fınaldyq kezeńine shyqty.
Al eshteńe sheshpeıtin juptyq synda Anna Danılına men quramaǵa alǵash qosylǵan Jibek Qulambaeva nemis qyzdaryna 1:2 esebimen ese jiberdi.
Qazaqstan quramasynan bólek, atalǵan týrnırdiń fınalyna joldama alǵan 12 eldiń qatarynda Aýstralııa, Polsha, Belgııa, Slovakııa, Kanada, Ispanııa, Chehııa, Shveısarııa, Italııa jáne AQSh tennısshileri bar. Al sońǵy 12-shi joldamanyń ıegeri sál keıinirek qosymsha oıyndar arqyly anyqtalady.
