Búgingi tańda josparlanǵan 1 trıllıon teńgeniń 534 mıllıard teńgesi berildi. Demek, «7-20-25» baǵdarlamasynyń áli 466 mıllıard teńge rezervi bar.
«Qazaqstannyń turaqty damý qory» AQ baspasóz qyzmetiniń málimetinshe, «7-20-25» baǵdarlamasy bastapqy, paıdalanýǵa berilgen turǵyn úıdi satyp alýǵa ǵana nesıe beredi. Eń kóp ıpotekalyq qaryz Nur-Sultan qalasynda berildi. 212,2 mlrd teńge somasyna 14 232 kredıt. Almatyda - 127,5 mlrd teńge somasyna 8 912 kredıt, Shymkentte – 33 mlrd teńge somasyna 2 843 kredıt berildi.
Alaıda, tájirıbe kórsetip otyrǵandaı, azamattardyń kópshiligi aqshany únemdeý úshin jáne tańdaý kóp bolǵandyqtan qurylysy aıaqtalmaǵan turǵyn úıdi brondaýdy qalaıdy.
«Osy tusta óte muqııat bolý kerek. Keıbir qurylys kompanııalary satyp alýshylardyń aqshasyn jınap alý maqsatynda Qazaqstan Respýblıkasynyń «Turǵyn úı qurylysyna úlestik qatysý týraly» zańynyń talaptaryna sáıkes kelmeıtin turǵyn úı satyp alýdyń ártúrli shemalaryn usynady. Turǵyn úı satyp alýdyń bul jolynda aqsha joǵaltý qaýpi bar. Osyǵan baılanysty, azamattardan ár qadamyn tarazylap baryp qana, sheshim qabyldaýyn suraımyz», delingen habarlamada.
Ipotekalyq baǵdarlamanyń talaptarynda baǵa lımıti belgilengen. Satyp alynatyn turǵyn úıdiń baǵasy Nur-Sultan, Almaty (qala mańy aımaqtaryn qosa alǵanda), Aqtaý, Atyraý jáne Shymkent qalalarynda 25 mıllıon teńgeden, Qaraǵandy qalasynda 20 mln teńgeden jáne qalǵan óńirlerde 15 mln teńgeden aspaýy tıis.
«7-20-25» baǵdarlamasy halyqtyń barlyq sanattaryna arnalǵan. Atynda turǵyn úıi joq, basqa ıpotekalyq nesıeleri joq, eńbek jáne/nemese kásipkerlik qyzmetten resmı túrde rastalǵan kirisi bar eldiń kez kelgen azamaty ıpoteka ala alady.
