Qazaqstannyń Gýanchjoý qalasyndaǵy Bas konsýldyǵy Qytaıdyń qoǵamdyq qaýipsizdik organdarynan resmı habarlama alǵan. Qazirgi ýaqytta Qazaqstan dıplomattary oqıǵanyń barlyq mán-jaıyn anyqtaý úshin QHR-dyń quzyrly organdaryna qosymsha suraý joldaǵan.
Syrtqy ister mınıstrligi ustalǵan azamattyń týystarymen turaqty baılanys ornatylǵanyn jáne oǵan qajetti konsýldyq-quqyqtyq kómek kórsetilip jatqanyn habarlady.
«Bul másele mınıstrliktiń erekshe baqylaýynda», dep málimdedi vedomstvo.
Buǵan deıin Mahmuthan Shernazarovtyń týystary Threads áleýmettik jelisinde jazba jarııalaǵan bolatyn. Olardyń aıtýynsha, Qazaqstan azamaty men Qytaı azamatynyń arasynda janjal týyp, arty tóbeleske ulasqan. Oqıǵa saldarynan qytaılyq azamat kóz jumǵan. Týystarynyń sózinshe, janjal kezinde M. Shernazarovqa birneshe adam shabýyl jasap, ketýine jol bermegen.
Olar tergeý barysynda beınejazbalar men barlyq dálelderdiń jan-jaqty qaralyp, istiń obektıvti túrde zerttelýin surap otyr.
Janbota BAHYTBEK,
EUÝ stýdenti
