1992 jyldan beri úzilmeı kele jatqan «Jas tulpar» búginde boıynda óner ushqyny bar jas órenderdiń talabyn ushtap, qanatyn qataıtatyn úlken mektepke aınalǵan. Osy ýaqytqa deıin Tobyl-Torǵaıdyń talaı tastúlegi osy ortadan túlep ushty. Biri respýblıkaǵa tanymal aıtysker atansa, biri ánshi-jyrshylyq baǵytty ustanyp, óńirde ulttyń dástúrli ónerin nasıhattap júr.
Ahań toıyna arnalǵan aıtystyń shymyldyǵy belgili aıtysker, Qazaqstannyń eńbek sińirgen mádenıet qaıratkeri Álpııa Ormanshınanyń quttyqtaý sózimen ashyldy.
– «Jas tulpar» aıtysy birinshi ret Naýyrzym aýdanynda ótti. Sodan beri osy aıtystyń kerýen-sapary áli toqtamaı keledi. Joba aıasynda qanshama darynnyń joly ashyldy. Kóbi shákirtime aınaldy. Sender de menen tálim alamyn deseńder, esh qarsylyǵym joq, esigim árdaıym ashyq. Aıbek Qalıev, Mamaı Iztileýler alǵashqy shákirtterim boldy. S.О́telbaeva, M.Ospanov, E.Áýezhandarǵa da tálim berdim. Báriń birdeı aıtysker bolyp ketpessińder, biraq úlken júrekti óner adamyna aınalatyndaryńa senimim mol. Jortqanda joldaryń bolsyn», dedi aqyn.
Jas aqyndar sheshile sóılep, kósile jyrlady deı almaspyz. Degenmen kóbi endi ǵana sahnadan kórine bastaǵan balǵyndar ǵoı. Barynsha oılaryn órnektep, sózderin kestelep jetkizýge tyrysty. Biri ushqyrlyǵy men tapqyrlyǵyn tanytyp, qarsylasyna qamshy basyp otyrsa, endi biri qobaljyp, tosylyp qalyp jatty.
Áıtse de Amankeldi aýdanynan kelgen Saıat Áýezhan, Qostanaı qalasynyń namysyn qorǵap shyqqan Dinasyl Baqytbek, rýdnyılyq Jambyl Toqqojaev, Meńdiqara aýdanynan kelgen Aqjúnis Júrsin sııaqty balalardyń óneri kópshilik kóńilinen shyqty.
Qazylar alqasy sońǵy aınalymǵa 6 aqyndy ótkizip, birden juptap berdi. Nátıjesinde, bas júldeni Dinasyl Baqytbek jeńip aldy. 1-orynǵa Jambyl Toqqojaev laıyq dep tanylyp, Aqjúnis Júrsin ekinshi oryndy ıelendi. Al Beıimbet Maılın aýdanynyń jas aqyny Nuraılym Qýantaı úshinshi oryndy qanaǵat tutty. Jyr saıysyna qatysqan jas ónerpazdardyń bárine arnaıy dıplomdar men aqshalaı syılyqtar tabys etildi.
Qostanaı oblysy
