Saryaǵash APB-ǵa jergilikti turǵynnyń biri úıinde zańsyz esirtki saqtaıtyny týraly aqparat túsken. Atalǵan jaıt QR Qylmystyq Kodeksiniń 296-baby (Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý) qylmystyq quqyq buzýshylyq boıynsha tirkeldi.
Saryaǵashtyq polıseıler habar alysymen kórsetilgen mekenjaıǵa shuǵyl jetip, turǵyn úıge tintý jumystaryn júrgizdi. Nátıjesinde, kúdiktiniń úıinen paketke salynǵan esirtkige uqsas zat tárkilenip, tıisti saraptamaǵa jiberildi.
Saraptama qorytyndysyna sáıkes, tárkilengen esirtki keptirilgen marıhýana bolyp shyqty. Sondaı-aq polısııa qyzmetkerleri kúdikti er azamattyń buryn dál osyndaı qylmyspen sotty bolǵanyn rastady. Qazirgi tańda kúdiktige qatysty sotqa deıingi tergeý amaldary júrgizilýde.
Aıana Toǵanbek
