Akkredıtteý jetistikterge jeteleıdi

Densaýlyq saqtaý salasy jıi synǵa ushyrap jatady. Dese de, sońǵy jyldary medısınalyq qyzmet sapasyn kóterý maqsatynda bul salada kóptegen jumystar atqarylý ústinde. Sonyń biri – medısına uıymdaryn akkredıtteýden ótkizý. Bul máseleni talqylaý maqsatynda Densaýlyq saqtaý mınıstrligi «Respýblıkalyq densaýlyq saqtaýdy damytý respýblıkalyq ortalyǵy» ShJQ RMK bas dırektorynyń orynbasary Dáýlethan ESIMOVTI sózge tarttyq. Dáýlethan Serǵazyuly, soń­­ǵy kezderi medısı­nalyq uı­ym­dardy akkredıtteý degen uǵymdy jıi kezdestiremiz. Jalpy, akkredıtteý degenimiz ne? Ne úshin qajet? – Akkredıtteý sózi latyn tilinen engen. Senim bildiremin degen maǵynany bildiredi. Ol – medısına ǵylymy men tehnologııanyń qazirgi zamanǵy damýy negizinde begilengen stan­darttarǵa sáıkestigin baǵalaý úshin qoldanylatyn úrdis. Akkredıtteý – eriktilik, táýelsizdik, ádildik, jarııalylyq jáne aıqyndyq qaǵıdattaryna negizdelgen, ári básekege qabiletti densaýlyq saqtaýdy qalyptastyrý, medı­sınalyq kómektiń sapasyn jaqsartý úshin júrgiziledi. – Elimizde mekemelerdi akkredıtteýden ótkizý jumysy qa­shan bastaldy? – 2007 jyly Qazaqstan Res­pýblıkasynyń Densaýlyq saqtaý mınıstrligi eń alǵashqy ulttyq standarttardy bekitti. Ol standarttar talaı ózgeriske ushyrady. 2009 jyldan bastap bizde akkredıtteý rásimi bastaldy. Jyl sanap akkredıtteýden ótýge nıettengen mekemelerdiń sany ulǵaıyp jatyr. – Demek, akkredıtteýden ótýge kez kelgen medısınalyq uıym ótinish bildire alady ǵoı? – Árıne, akkredıtteý erikti túrde ótedi. Bizge mekemeler syrt­qy keshendi baǵalap, ótkizýdi surap aldymen ótinish beredi. Baǵalaýdan ótý medısınalyq mekemelerdiń ózderi úshin paıdaly. Sebebi, tá­ji­rıbemizden baıqaǵanymyzdaı, kóbinese halyq syrtqy keshendi baǵalaýdan ótken medısınalyq uıymǵa senim artady. – Akkredıtteýden ótkizý úshin qarajat qajet pe? – Joq, bizde Dúnıejúzilik qaıta qurý jáne damý bankiniń «Densaýlyq saqtaý salasyna tehnologııalardy berý» jónindegi jobasy sheńberinde akkredıtteý tegin ótkiziledi. Damyǵan el­derde medısınalyq me­ke­meler syrtqy keshendi baǵalaýǵa qatysý úshin mol qarjy jumsaıdy. Bul jaǵynan alǵanda akkredıtteýdiń tegin ótkizilýi – otandyq medısınalyq uıymdar úshin edáýir kómek bolyp tabylady. – Jalpy, baǵalaý barysynda basty nazar nege aýdarylady? – Akkredıtteýden ótýge nıettengen medısınalyq uıymdar jan-jaqty baǵalaýdan ótkiziledi. Sebebi, ol kezde jalpy basqarý, dárilik qaýipsizdik, órt qaýipsizdigi, naýqastyń qaýipsizdigi, qarjyny basqarý, eńbek sharalarynyń júrgizilý barysy, ishki aýdıt, resýrstardy basqarý, eńbek gıgıenasy jáne t.b. parametrlerge jiti nazar aýdarylady. Bul medısınalyq qyzmet sapasyn arttyrýǵa, tehnıkalardy zaman talabyna sáıkestendirýge, medısına salasyn jetildirýge septigin tıgizedi. – Akkredıtteý medısı­na­nalyq uıymdarǵa ne beredi? – Jańa aıtyp ótkenimdeı, ba­ǵa­laý barysynda kóptegen para­metr­lerge nazar aýdarylady. Son­dyqtan biz ol mekemelerdiń álsiz tustaryn aıqyndap, oń ná­tı­je beretin joldaryn kórsete­miz. Bul medısınalyq kómek sapa­synyń jaqsarýyna septigin tıgi­ze­di. – Áńgimeńizge rahmet. Áńgimelesken Gaýhar ERMEKBAEVA.