Jańarǵan murajaı-úıdiń ashylý rásimine qala ákimi Erbolat Dosaev qatysty, oǵan alǵashqylardyń biri bolyp jazýshynyń qyzdary – Gúlnar men Gaýhar Músirepovalar keldi.
«Kúrdeli jóndeýden, modernızasııadan jáne reekspozısııadan keıin Ǵabıt Músirepov murajaıy elimizdegi alǵashqy zamanaýı mýltımedııalyq ádebı ortalyqqa aınalady. Rekonstrýksııa jáne reekspozısııa boıynsha júrgizilgen keshendi jumys jyl saıyn murajaıǵa kelýshiler sanyn eki esege – 22 myń adamǵa deıin arttyrýǵa múmkindik beredi dep josparlanýda», dedi Almaty qalasy ákimdiginiń baspasóz qyzmeti.
Murajaıdy jańartý jumystaryna mýzeı jáne arhıv isi salasyndaǵy jetekshi mamandar, dızaınerler, sýretshiler, beıneınjenerler jáne t.b. tartyldy. Jańartylǵan murajaıdyń jobasy jazýshynyń týystarymen kelisildi, jobanyń tujyrymdamasy men eskızin Almaty qalasynyń Mádenıet basqarmasy bekitti.
Eske salsaq, Ǵabıt Músirepovtiń sońǵy 18 jyl turǵan páteri 1991 jyly QR Ortalyq memlekettik mýzeıiniń bir bóligi retinde murajaıǵa aınalǵan. 1999 jyldan bastap nysan S.Muqanov pen Ǵ.Músirepovtiń memlekettik ádebı-memorıaldyq murajaı kesheni bolyp qaıta quryldy. 2015 jyldan bastap murajaı «Almaty qalasy mýzeıler birlestigi» KMQK quramynda.
Ǵ.Músirepov murajaı-úıiniń alańy 114,6 sharshy metrdi quraıdy. 2 memorıaldyq bólme, 1 ádebı zal bar. Memorıaldyq bólmedegi zattar (jazý ústeli, kitaphana, jeke tutyný zattary, syılyq zattary jáne t.b.) burynǵy kúıinde saqtalǵan.
Aıana Toǵanbek
