Atyraý oblysy boıynsha kedendik baqylaý departamenti kontrabandaǵa qarsy kúres basqarmasy qyzmetkerlerimen jedel – izdestirý sharasyn júrgizý kezinde belgisiz tulǵamen Kedendik odaq aýmaǵyna 2011 jyly shyqqan «MAZDA-6» markaly avtokóligi ákelingendigi anyqtaldy. Bul týraly departamenttiń baspasóz qyzmeti habarlady.
Atalǵan avtokólikti Belarýs Respýblıkasynan Qazaqstan aýmaǵyna ákelip, Atyraý qalasynyń turǵynyna satqan. Keıin ol Atyraý oblystyq salyq departamentine Kedendik odaqqa múshe elden ákelingen taýar retinde 12 paıyz kóleminde qosymsha qun salyǵyn tólegen.
Jedel tekserý kezinde oblystyq ishki ister departamentiniń ákimshilik polısııa basqarmasynan atalǵan avtokólikti tirkeýge qoıýǵa negiz bolǵan qujattar alyndy. Qujat boıynsha «MAZDA-6» markaly avtokóligi Belarýs Respýblıkasynyń Grodno qalasynda satylyp, satý satyp-alý esep–anyqtamasy biryńǵaı saýda kásiporny «Doroga» dúkeninde resimdelgen. Avtokólik ıesi Belarýs Respýblıkasynyń Grodno qalasynyń turǵyny dep kórsetilgen. Alaıda, Belarýs Respýblıkasynyń Grodno kedeniniń bergen aqparatyna sáıkes, kólik ıesi kórsetilgen mekenjaıda tirkelmegen. Sonymen qatar, biryńǵaı saýda kásiporny «Doroga» kórsetilgen avtokóligin satyp alý – satý rásimi júrgizilmegen jáne satyp-alý esep – anyqtamasynda kórsetilgen málimetter shyndyqqa janaspaıtyndyǵy málim boldy.
Sot-kólik taýarlyq saraptama qorytyndysyna sáıkes, 2011 jyly shyǵarylǵan «MAZDA-6» avtokóliginiń naryqtaǵy ortasha kuny 4 mln. 106 myń teńgeni quraıdy. Atalǵan fakt boıynsha departamenttiń kontrabandaǵa qarsy kúres basqarmasymen Qylmystyq kodekstiń 209-babynyń 1-bóliminde (Ekonomıkalyq kontrabanda) kózdelgen qylmys belgileri boıynsha qylmystyq is qozǵaldy.
Joldasbek Shópeǵul.
Atyraý oblysy.
Derekkóz: Oblystyq kedendik baqylaý departamenti.
Foto: www. Drive 2.ru.
