Búgin Sybaılas jemqorlyqqa qarsy is-qımyl agentigi Qoǵamdyq keńesiniń kezekti otyrysy ótti. Otyrysqa Agenttik Tóraǵasy O. Bektenov, Qoǵamdyq keńes tóraǵasy D. Qydiráli jáne qoǵam belsendileri qatysty.
Keńestiń jańa múshesine memleket qaıratkeri, bokstan Olımpıada chempıony S. Sapıev jáne «Ádildik joly» RQB atqarýshy dırektory D. Smaǵulov kirdi.
Otyrysta QR Prezıdentiniń «memlekettik apparat qyzmetin bıýrokratııasyzdandyrý jónindegi sharalar týraly» Jarlyǵyn júzege asyrý aıasynda Sybaılas jemqorlyqqa qarsy qyzmet qabyldap jatqan sharalar týraly aıtyldy.
Agenttik Tóraǵasy O. Bektenov memlekettik apparatty bıýrokratııasyzdandyrý boıynsha qabyldanyp jatqan sharalar óte mańyzdy jáne ýaqtyly ekenindigin, Antıkor jekelegen bıznes-prosesterdi ońtaılandyrýdy bastaǵandyǵyn atap ótti.
Sonymen qatar keńes múshelerine kóliktik baqylaý salasyndaǵy sybaılas jemqorlyq táýekelderin syrtqy taldaýdyń aldyn ala nátıjeleri, sondaı-aq polıseılerdiń zańsyz áreketteri boıynsha qylmystyq isterdiń tergeý barysy aıtyldy.
«Men qoǵamdyq keńeske paıda ákeletinime senimdimin, óıtkeni meniń azamattyq ustanymym bar. Men eldiń qarapaıym azamaty retinde adal memlekette, sybaılas jemqorlyqsyz, ádil memlekette ómir súrgim keledi. Meniń jumys tájirıbem, meniń ustanymym memleketimizdi damytýǵa jáne Sybaılas jemqorlyqqa qarsy is-qımyl agenttigine, atap aıtqanda, qoǵamdyq keńeske el ıgiligi úshin paıda ákelýge múmkindik beredi dep oılaımyn», dep atap ótti Olımpıada chempıony S. Sapıev.
Qoǵamdyq keńes músheleri sybaılas jemqorlyqqa qarsy saıasat negizinde qabyldanǵan Tujyrymdamanyń zardaptarmen kúresten sybaılas jemqorlyqtyń alǵysharttaryn júıeli túrde joıýǵa, jaýapkershiliktiń bultartpastyǵyn qamtamasyz etýge, qoǵamdyq sanany túbegeıli ózgertýge baǵyttalǵanyn atap ótti. Atalǵan qujat aıasynda aldaǵy ýaqytta jumystar óz jalǵasyn tabady.
