Aımaqtar • 22 Sáýir, 2022

BQO-da jol máselesi 2 jyl ishinde túbegeıli ózgerýi tıis - Álıhan Smaıylov

644 ret kórsetildi

Qazaqstan Respýblıkasynyń Premer-Mınıstri Álıhan Smaıylov jumys saparymen Batys Qazaqstan oblysyna keldi, dep habarlaıdy Egemen.kz.

Eske sala keteıik, keshe Prezıdent «Egemen Qazaqstan» gazetinde jarııalanǵan «Kúre joldaǵy kúrsinis» atty maqalaǵa nazar aýdaryp, uzaq jyldar boıy sheshilmeı kele jatqan Batys Qazaqstan oblysyndaǵy kúre joldar problemasy boıynsha Úkimetke jáne oblys basshysyna tapsyrmalar júktegen edi.

Úkimet basshysy Batys Qazaqstan oblysyna kelgen boıda óńirdegi avtojoldar máselesine nazar aýdardy. Qurylysy bıyl bastalǵaly otyrǵan 144 shaqyrymdyq «Podstepnoe – Terekti – RF shekarasy» jolynyń boıyna aıaldap, oblys aýmaǵyndaǵy avtojoldardyń sapasy men olardy jóndeý barysymen tanysty.

,

Aıta keteıik, sońǵy málimetter boıynsha, Batys Qazaqstan oblysynda avtojoldardyń jalpy uzyndyǵy 6176 km. Onyń 1414 shaqyrymy – respýblıkalyq dárejedegi joldar sanatynda bolsa, al 4762 shaqyrym jol jergilikti deńgeıde. Mine, osy respýblıkalyq joldardyń – 182 shaqyrymy, oblystyq jáne aýdandyq joldardyń – 2887 shaqyrymy múldem qanaǵattanarlyqsyz. Jańbyr jaýsa, mı batpaqqa aınalady.

Eń kókeıkesti másele – Qaztalov, Jánibek jáne Bókeı ordasy aýdandaryn Oral qalasymen jalǵaıtyn kúre joldyń qurylysy 2019 jyly Prezıdent tapsyrmasymen bastalǵan bolatyn. Joba boıynsha 2021 jyly aıaqtalýy tıis 248 shaqyrymdyq joldyń búginde 20%-y ǵana salynǵan.

,

- Avtojol – Batys Qazaqstan oblysyndaǵy eń kúrdeli máseleniń biri. Buǵan bárimiz de kinálimiz. Bıyl bul jumystardy negizinen oryndaýymyz kerek. Úsh jyl buryn bastalǵan joba qarjylandyrý máselesinen bitpeı jatyr. Sondyqtan bıyl 15 mlrd teńge qosymsha bólip otyrmyz. Tehnıkalyq múmkindik bar bolsa, jumysty budan da tezdetý kerek. Qosymsha qarajatty biz tabamyz. Al mynaý Podstepnoe-Reseı shekarasy arasyndaǵy respýblıkalyq jolǵa biz bıýdjetti naqtylaǵan kezde 6 mlrd teńge bóldik. Qazir «Qazavtojol» barlyq jumysty bastady. Buǵan qosymsha «Qarashyǵanaq Petroleým Opereıtıng b.v.» kompanııasymen de sóılesemiz. Jáne jetpegen aqshany respýblıkalyq bıýdjetten taǵy da qosymsha bólemiz. Sonymen bıyl jáne kelesi jyly óńirdegi avtojoldar máselesin túbegeıli ózgertýge tıispiz. Ǵalı Nájimedenuly, óńirdegi jol qurylysyn erekshe nazarda ustaýyńyz kerek. Mınıstrlik arqyly tıisti qarajat bólý máselesin der kezinde kóterip, jáne bólingen qarjyny ornymen paıdalanýyn ózińiz qadaǵalaýyńyz qajet, - dep tapsyrdy Álıhan Smaıylov Batys Qazaqstan oblysy ákimi Ǵalı Esqalıevke.

«Qazavtojol» Qazaqstan Ulttyq kompanııasy basqarma tóraǵasy Meıirhat Qasymbaevtyń aıtýynsha, Qaztalov, Jánibek jáne Bókeı ordasy aýdandaryna salynyp jatqan jol qurylysynyń kesheýildeýine birneshe sebep bar. Bastapqyda, 2019 jyly qarjylandyrý tapshy bolǵan, odan keıin baǵa qymbattaǵan, dúnıejúzilik pandemııa kılikken, merdiger kompanııalardyń jaýapsyzdyǵy taǵy bar. 2019 jyly Memleket basshysynyń synyna ushyraǵan jol. Sodan bastap qarjy bólinýi tıisti edi, sál toqtap qaldy. Bul dúnıejúzilik pandemııaǵa baılanysty, jumysshylar da aýyrdy, qarjylandyrý da sál keshikti. Sodan keıin janar-jaǵarmaı qymbattap ketti. Osynyń bári qosylyp, jol qurylysy toqtap qalǵan bolatyn.

- Qaztalov, Jánibek, Bókeı ordasy aýdandaryna baratyn 248 km joldy kúrdeli jóndeý boıynsha búginge deıin 57 mlrd teńge bólindi. Obektıvti jáne sýbektıvti faktorlarǵa oraı 2019 jyldan beri ol jerde jumys óte nashar júrdi. Bıyl tapsyrys berýshi «Qazavtojol» Ulttyq kompanııasy barlyq jaǵdaıdy, sonyń ishinde jol qurylysyna qajetti ınertti materıaldardy tasymaldaý quny men baǵanyń ósýin saralap, tıisti qorytyndy shyǵardy. Bıyl jol jóndeý qurylysy kúsheıtilgen rejımde jalǵasady. Jospar boıynsha 113 shaqyrym joldy bitirip, bıyl paıdalanýǵa beremiz. О́zderińiz bilesiz, jol qurylysyna qajetti tas negizinen Aqtóbe oblysynan ákelinedi. Ol materıal Reseı terrıtorııasy arqyly temirjolmen ótýi tıis. Bul jerde vagon tapshylyǵy, eki el vagondarynyń standarttary sáıkespeýi sekildi máseleler týyndaǵan edi. «Qazaqstan temir joly» kompanııasymen talqylap, barlyq túıitkildi sheshtik. Búgingi tańda 260 vagon júrip jatyr, onyń sany óse beredi. Jol qurylysy kezinde kelisim-shart mindetterine jaýapsyz qaraǵany úshin «Temirjol jóndeý» kompanııasyn jobadan alyp tastadyq. Qazir joldyń ol bóligin salý úshin elektrondy tender ótip jatyr, jańa merdiger eki aptanyń ishinde belgili bolady. Osylaısha biz kelesi jyly barlyq 248 kılometr joldy tapsyrýdy josparlap otyrmyz, - dedi «Qazavtojol» Qazaqstan Ulttyq kompanııasy basqarma tóraǵasy Meıirhat Qasymbaev.

Prezıdent tapsyrmasynan keıin Batys Qazaqstan oblysynyń avtojoldaryn jóndeý máselesi erekshe serpin alǵanyn baıqadyq. Bıyl óńirde jalpy uzyndyǵy 679 shaqyrym jolǵa jóndeý bastalmaq, onyń 451-i respýblıkalyq, 228 shaqyrymy jergilikti joldar. Osy maqsatqa respýblıka bıýdjetinen 28 mlrd, jergilikti kózderden 15 mlrd teńge – jalpy kólemi 43 mlrd teńge bólinip otyr eken. Premer-mınıstr aıtqandaı, bul da shegi emes. Eger merdiger kompanııalar jumysyn shıratyp, ıgere alsa, qosymsha qarjy taǵy qaralmaq.

Sóz basynda aıtylǵan 144 shaqyrymdyq «Podstepnoe – Terekti – RF shekarasy» jolyna kelsek, bul joldyń boıynda 94 myń turǵyny bar 50 eldimeken bar. Áıgili Qarashyǵanaq kenishi, óndiristi Aqsaı qalasy oblys ortalyǵymen osy jol arqyly baılanysady. Kún saıyn óz elimizdiń jáne shet memleketterdiń ondaǵan myń azamaty júrip ótetin bul joldyń da jaǵdaıy qanaǵattanarlyqsyz kúıge jetken edi. «Qazavtojol» Ulttyq kompanııasy osy joldy 36 shaqyrymdyq 4 bólikke bólip, tender jarııalaǵan. Joldyń birinshi jáne tórtinshi bóligi qurylysy úshin bıyl 6 mlrd qarastyrylǵan. Tender 20 mamyrda qorytyndylanyp, jeńimpaz merdigerler anyqtalady. Al qalǵan eki bólikke «Qarashyǵanaq Petroleým Opereıtıng b.v.» kompanııasynyń qarjysyn paıdalaný máselesi qarastyrylýda.

Árıne, joǵaryda atalǵan eki jolmen óńir turǵyndarynyń jol máselesi túgel sheshile qoımaıdy. Jaıyq ózeniniń sol jaǵyndaǵy aýyldar zaryǵa kútip otyrǵan Barbastaý-Inder joly men Jańaqala men Bókeı ordasy aýdandaryn jalǵaıtyn kúre jol da kóptiń kóńilinde kópten júrgen túıtkil. Batys Qazaqstan oblysynda Jaıyq ózeni myń shaqyrymǵa jýyq sozylyp jatyr, sonyń eki-aq jerinde avtokópir salynǵan. Ol eki kópir de Oral qalasynda. Al Aqjaıyq, Taıpaq óńiriniń halqy ózenniń arǵy betine ótý úshin sandalyp, Atyraý oblysymen aınalady...

Degenmen, seń qozǵaldy. Batys Qazaqstan oblysynyń avtojoldary salasynda túbegeıli betburys bolǵaly tur. О́ńir halqy kóp keshikpeı jol azabynan qutylatyn boldyq dep úmittenip otyr. 

P.S. Qazaqstan Respýblıkasynyń Premer-Mınıstri Álıhan Smaıylov óńirde Poıma maı kombınaty, №18 mektep, Oral jylyjaı kombınaty, Kvant jıhaz fabrıkasy, Oral transformator zaýyty, t.b. sekildi birqatar nysandy aralap, túrli sala ókilderimen kezdesti. Úkimet basshysynyń Batys Qazaqstan oblysyna sapary týraly tolyq maqala gazetimizde jarııalanatyn bolady.

Batys Qazaqstan

Sońǵy jańalyqtar

EQYU Bas hatshysy Qazaqstanǵa keledi

Parlament • Búgin, 09:31

Beısenbige arnalǵan aýa raıy boljamy

Aýa raıy • Búgin, 09:00

Shabyt shaqyratyn shahar

Elorda • Keshe

Aqjaınaq astana

Elorda • Keshe

Ozyq óndiris ornynda boldy

Aımaqtar • Keshe

Dımash pen Djekson

О́ner • Keshe

Uqsas jańalyqtar