Tanymal telejýrnalıst Nurtileý Imanǵalıulynyń týǵanyna bıyl 70 jyl tolyp otyr. 1977 jyly QazMÝ-di bitirgen talantty tulǵa áýelgi eńbek jolyn Qazaq televızııasynda tilshi bolyp bastap, keıin redaktor, aǵa redaktor, kommentator, bas redaktor, saıası sholýshy, dırektordyń orynbasary, «Habar» agenttiginde moderator-júrgizýshi, odan keıin Úkimet keńsesinde sektor meńgerýshisi, Prezıdent Ákimshiliginde bas maman bolyp qyzmet istegen. Korrýpsııaǵa qarsy kúres jónindegi memlekettik komıssııasynyń múshesi, «Qazaqstan» RTRK» AQ basqarma tóraǵasy qatarly qyzmet atqarǵan.
Osy oraıda mýzeı qoryna tabystalyp otyrǵan jádigerler qatarynda, jýrnalıstiń qyzmettik jáne otbasylyq estelikteri jınaqtalǵan foto-albom, «Qazaq jeriniń zııalylary» atty ensıklopedııasy men ulttyń únjarııasy, kostıým-shalbary, kóılegi, sómkesi, qalamsaby, kózildirigi, qoıyn dápterleri, «Beıimbet Maılın – 125 jyl», «Ilııas Jansúgirov – 125 jyl», «Áset Naımanbaıuly – 150 jyl» medaldary bar.
«Nurtileý Imanǵalıuly eldiń azamaty, otbasynyń berik tiregi boldy. Búgin ózi qoldanǵan zattarynyń bir bóligin Ulttyq mýzeıge tapsyryp, ol jaıly eskirmes estelikterdiń keıingi urpaq jadynda saqtalýyna atsalystyq dep oılaımyn. Nurtileýdiń ózi aıtqandaı «patsha kóńildi kórermeni» budan bylaı ol qoldanǵan zattardy ulttyq mýzeıden tamashalaı alady. Nurtileý óz salasynyń kásibı mamany ǵana emes jan-jaqty bilimdi, jeke ómirdegi qasıetterin úlgi etýge laıyq. Onyń dáleli jyly estelikter men artynda qalǵan muralary», deıdi jýrnalıstiń jary Qarlyǵash Sovetbekqyzy.
