QUB tóraǵasy Pirmatovtyń aıtýynsha, qazirgi jaǵdaıda ınflıasııanyń ósý úrdisin keri qaıtarý úshin bazalyq mólsherlemeni arttyrý qajet. Bul rette bazalyq mólsherlemeniń deńgeıine qatysty sheshim teńdestirilgen jáne bul sheshim onyń ekonomıkalyq belsendilikke áserin eskere otyryp qabyldanady.
«Biz budan nesıeleýge jáne ekonomıkalyq ósýge aıtarlyqtaı qaýip tóndirmeıtinin kórip otyrmyz, biraq ınflıasııany baqylaý úshin asa mańyzdy. Belgilengen bazalyq mólsherleme deńgeıine qatysty aıtatyn bolsaq, qazirgi ýaqytta ońtaıly sheshim bolǵany sózsiz jáne búgingi qalyptasqan jaǵdaıǵa tolyqtaı sáıkes keledi. Jumsartylǵan aqsha-kredıt saıasaty bir mezettik kúmándi paıdaǵa keneltýi múmkin, biraq uzaq merzimdi perspektıvada onyń saldary qaıtarymsyz bolady», dedi Pirmatov QUB-tyń baspasóz-brıfıngi kezinde.
Brıfıngte aıtylǵan málimetke sáıkes, nesıelendirý kóleminiń ósýine qarap ekonomıkalyq belsendilikti baǵalaýǵa bolady. Máselen, birinshi toqsanda ekonomıkaǵa berilgen jańa kredıtterdiń kólemi 2021 jyldyń osy kezeńimen salystyrǵanda 25,3 paıyzǵa ulǵaıǵan, onyń ishinde bızneske - 19,6 paıyz, halyqqa - 32,5 paıyz.
«Degenmen, 2022 jylǵy naýryzdyń qorytyndysy kórsetkendeı, belgisizdik beleń alyp, nesıe berý sharttary ózgerip jatqan jaǵdaıda mólsherlemeniń kóterilgeni kredıtteý úshin tejeýshi faktor bolmaıdy», dedi Pirmatov.
Ulttyq banktiń Aqsha-kredıt saıasaty jónindegi komıtetiniń bazalyq mólsherleme boıynsha kezekti josparly sheshimi 2022 jyly 6 maýsymda Nur-Sultan ýaqyty boıynsha saǵat 15:00-de jarııalanady.
Aıta keteıik, Ulttyq banktiń Aqsha-kredıt saıasaty jónindegi komıteti (QUB) 25 sáýirde bazalyq mólsherlemeni + / - 1,00 p. t. paıyzdyq dálizimen jyldyq 14 paıyz deńgeıinde belgileý týraly sheshim qabyldady.
