Birlik kúni jáne Qazaqstan halqy Assambleıasynyń HHH jáne HHHI sessııalarynyń qarsańynda uıymdastyrylǵan bul is-sharaǵa arnaıy qatysqan oblys ákimi Jeńis Qasymbek etnomádenı birlestikterdiń beıbitshilik pen kelisimdi saqtaý maqsatynda júrgizip jatqan jumystarynyń mańyzdylyǵyn atap ótti.
– Álemdegi qazirgi jaǵdaı bizdiń eń basty jetistigimiz beıbitshilik ekenine burynǵydan beter kózimizdi jetkizdi. Biz muny bolashaq urpaq úshin saqtaýymyz kerek. Kópultty el úshin Assambleıanyń rólin baǵalamaý nemese asyra baǵalaý qıyn. Biz – úlken otbasymyz. Kez kelgen otbasynda keıde máseleler týyndaıdy. Biraq etnomádenı birlestikterdiń arqasynda olardyń barlyǵy jedel sheshilýde. QHA-nyń óńirdegi áleýmettik-saıası jaǵdaı men ekonomıkalyq turaqtylyqqa qosqan úlesi zor, – degen ol aldaǵy ýaqytta da Assambleıanyń biregeı alańqaıyn belsendi túrde paıdalaný kerektigin atap ótti.
Al Qaraǵandy oblystyq QHA Analar keńesiniń múshesi, Y.Altynsarın tósbelgisiniń ıegeri Kúlásh Tóleýhanova óskeleń urpaq tárbıesi, otbasy ınstıtýtyn saqtaý, jumysqa ornalastyrý jáne jańa jumys oryndaryn qurý máseleleri sóz bolǵan jıynda aqyldy jáne tárbıeli balalardyń kez kelgen eldiń birligi men ıgiliginiń negizi ekenine basa mán berdi.
– Bizdiń elimizdiń bolashaǵy jas urpaqty qalaı tárbıeleıtinimizge baılanysty bolady. Sondyqtan biz balalardy tárbıeleý isine mektepterde de, otbasynda da úlken mán berýimiz kerek. Ulttyq ádet-ǵuryptar men dástúrlerge saı tárbıelengen jan-jaqty damyǵan jastar ǵana jarqyn bolashaq qura alady, – dedi K.Tóleýhanova.
Basqosýda NZM oqýshylary medısına, ekologııa salasyndaǵy jańalyqtarymen jáne jetistikterimen bólisti. Sondaı-aq Kúntý Serikjan esimdi spıker áleýmettik jelilerdi tek ıgi ister jasaý maqsatynda paıdalanýǵa shaqyrdy.
Dóńgelek ústel jumysynyń sońyna taman óńirdiń qoǵamdyq-saıası ómirine belsendi qatysqany jáne jańa qazaqstandyq qoǵamdy qurýǵa qosqan úlesi úshin Vılen Molotov-Lýchanskıı, Vıtalıı Tvarıonas, Despına Kasapıdı, Vıktor Kıstý, Lılııa Kım, Ramıs, Mıhaıl Konovalov, Rýstam Býzıakov syndy etnomádenı qoǵamdyq birlestikteriniń tóraǵalary men múshelerine oblys ákiminiń atynan «Alǵys hattar» tabys etildi.
Al dóńgelek ústel is-sharasyn Qazaqstan halqynyń birligi kúnine arnalǵan balalar sýretteriniń kórmesi túıindedi.
