Kezdesýde Qazaqstan men Japonııa arasyndaǵy saýda-ekonomıkalyq, ınvestısııalyq jáne mádenı-gýmanıtarlyq salalardaǵy keńeıtilgen strategııalyq seriktestiktiń jaı-kúıi men damý perspektıvalary, sondaı-aq halyqaralyq qurylymdar aıasyndaǵy ózara is-qımyl máseleleri talqylandy.
Qasym-Jomart Toqaev Ioshımasa Haıashıge iltıpat bildirip, ekijaqty baılanystardy odan ári ilgeriletý úshin onyń bul saparynyń máni zor ekenin atap ótti.
– Japonııa – elimiz úshin dostas memleket. Biz ekijaqty qatynastardy joǵary baǵalaımyz. Bıyl eki el arasyndaǵy qatynastardyń 30 jyldyǵyn atap ótemiz. Bul – tarıhı beles. Osy kezeń ishinde konstrýktıvti yntymaqtastyq ornattyq, strategııalyq seriktestikti keńeıttik. Bul ózara atqarǵan jumystyń oń nátıjesi, – dedi Qasym-Jomart Toqaev.
Qazaqstan men Japonııa arasyndaǵy yntymaqtastyqta ekonomıkalyq qatynastar mańyzdy ról atqarady. Prezıdent saýda jáne ınvestısııalyq yqpaldastyqtyń áleýeti zor ekenine nazar aýdardy. Memleket basshysy Japonııamen aradaǵy kópjaqty ekonomıkalyq baılanystardy kúsheıtýge nıetti ekenin aıtty. Budan bólek eki eldiń BUU aıasyndaǵy tabysty yqpaldastyǵyn, sondaı-aq mádenı-gýmanıtarlyq saladaǵy múmkindikterin joǵary baǵalady.
Qasym-Jomart Toqaev Japonııanyń Premer-mınıstri Fýmıo Kıshıdany qolaıly ýaqytta Qazaqstanǵa saparmen kelýge shaqyrǵanyn naqtylady. Memleket basshysynyń pikirinshe, joǵary deńgeıdegi kezdesýlerdi uıymdastyrý úshin Qazaqstan men Japonııa arasyndaǵy yntymaqtastyqtyń qazirgi ahýaly men áleýetiniń berik negizi bar.
О́z kezeginde Ioshımasa Haıashı kezdesýge múmkindik bergeni úshin Qasym-Jomart Toqaevqa alǵys aıtty. Mınıstr Japonııa Úkimetiniń Qazaqstanmen saýda-ekonomıkalyq jáne ınvestısııa salalary boıynsha ózara tıimdi seriktestikti keńeıtýge daıyn ekenin jetkizdi. Sondaı-aq Ortalyq Azııa elderiniń ishinde Qazaqstanda japon kompanııalary kóp ekenin atap ótti.
Ioshımasa Haıashı Qasym-Jomart Toqaevtyń basshylyǵymen júzege asyrylyp jatqan aýqymdy reformalardy qoldady jáne Qazaqstannyń aýǵan halqyna gýmanıtarlyq kómek kórsetý jónindegi kúsh-jigerine joǵary baǵa berdi.
Budan bólek áńgimelesý barysynda halyqaralyq jáne óńirlik kún tártibindegi ózekti máseleler talqylandy. «Ortalyq Azııa – Japonııa» formatyndaǵy dıalogty odan ári damytýdyń mańyzdy ekeni atap ótildi.
