Qazaqstan men Grýzııa arasyndaǵy dıplomatııalyq qarym-qatynastyń ornaǵanyna 30 jyl toldy. Q.О́skenbaevtyń aıtýynsha, sońǵy 16 jylda Grýzııadan Qazaqstanǵa jalpy tikeleı ınvestısııa aǵyny 285 mln dollardan asqan. Al Qazaqstan Grýzııa ekonomıkasyna 495,3 mln dollar ınvestısııa quıǵan. О́tken jyly eki el arasyndaǵy taýar aınalymy 88 mln dollardan asty. Jyl basynan beri oń dınamıka saqtalyp otyr.
Mınıstr eki el arasyndaǵy ózara saýda-sattyqty arttyrý úshin aıtarlyqtaı áleýet bar ekenin atap ótti. Qazaqstandyq kompanııalar metallýrgııa, munaı-hımııa, tamaq jáne mashına jasaý, sondaı-aq farmasevtıka syndy birqatar salada óńdelgen taýarlar eksportyn arttyrýǵa daıyn. Jalpy, eksporttyq áleýet 170 mln dollarǵa baǵalanyp otyr.
– О́nerkásip salasynda grýzındik áriptesterimizdi yntymaqtastyqqa jáne Qazaqstanda birlesken kásiporyndar qurýǵa shaqyramyz. Biz qoldaý kórsetýge daıynbyz. Búgingi tańda elimizde Grýzııanyń qatysýymen 248 birlesken kásiporyn jumys isteıdi, – dedi Q.О́skenbaev.
Indýstrııa jáne ınfraqurylymdyq damý mınıstri qazir Qazaqstanda belsendi ındýstrııalyq-ınnovasııalyq saıasat júrgizilip jatqanyn, al damýdyń basym baǵyttarynyń biri birlesken joǵary tehnologııalyq óndiristerdi engizý ekenin atap ótti.
– Álemdegi kúrdeli geoekonomıkalyq jaǵdaıǵa qaramastan, Qazaqstannyń ınvestısııalyq ahýaly men makroekonomıkalyq jaǵdaıy turaqty jáne ınvestorlar tarapynan senimge ıe, – dedi ol.
Plenarlyq otyrys barysynda qatysýshylar Qazaqstan men Grýzııa arasyndaǵy kólik, kommýnıkasııa, IT jáne ınnovasııalar, aýyl sharýashylyǵy, mádenıet, sport jáne týrızm sııaqty salalardaǵy yntymaqtastyqtyń jaı-kúıi men damý perspektıvalaryn talqylady.
Atap aıtqanda, ádettegideı Transkaspıı halyqaralyq kólik baǵytyn (HTR) damytý perspektıvalary qarastyryldy. Q.О́skenbaev bul baǵytta qazaqstandyq eksporttyń ulǵaıatynyn, onyń ishinde Qytaıdan tranzıttiń kólemi arta beretinin, osy oraıda Grýzııa aýmaǵy arqyly tranzıttiń yńǵaılylyǵyn saqtaı otyryp, yntymaqtastyqty odan ári damytý kerektigin atap ótti.
Sonymen qatar qos tarap densaýlyq saqtaý salasynda yntymaqtastyq, atap aıtqanda, bilim jáne tájirıbe almasý boıynsha uzaq merzimdi yntymaqtastyqty nyǵaıtý jáne keńeıtý boıynsha usynystardy qarastyrdy.
Úkimetaralyq komıssııanyń 11-shi otyrysynyń qorytyndysy boıynsha Q.О́skenbaev pen L.Davıtashvılı tıisti hattamaǵa qol qoıdy. Sonymen qatar is-shara aıasynda «Qazaqstan Respýblıkasynyń Mádenıet jáne sport mınıstrligi men Grýzııanyń Mádenıet, sport jáne jastar mınıstrligi arasyndaǵy sport salasyndaǵy ózara túsinistik týraly» memorandýmǵa, sondaı-aq standarttaý jáne metrologııa salasyndaǵy yntymaqtastyq týraly kelisimge qol qoıyldy.
