«Bıyl makroekonomıkalyq ahýal geosaıası jaǵdaıdyń nasharlaýy men álemdik qarjy, taýar naryǵyndaǵy qubylmalyqtyń artýy aıasynda damyp jatyr. Geosaıası shıelenisten taýar jetkizý problemalary kúrdelenip, álemde ınflıasııalyq qysym kúsheıip keledi. Osyǵan baılanysty Halyqaralyq valıýta qory jahandyq ınflıasııanyń joǵary deńgeıi aldyńǵy boljammen salystyrǵanda uzaǵyraq saqtalady dep kútedi», dedi Ǵalymjan Pirmatov Senat otyrysynda.
Birikken Ulttar Uıymy qadaǵalaıtyn álemdegi azyq-túlik baǵasy ındeksi 1990 jyldan bastap eń joǵary kórsetkishke jetti. Azyq-túliktiń álemdik baǵasy 2022 jyly da, 2023 jyly da joǵary deńgeıde qalady dep kútilip otyr.
«Azyq-túlik, shıkizat, janar-jaǵar maı, gaz baǵasynyń qymbattaýynan Eýroodaq pen AQSh-taǵy ınflıasııa kóp jyldyq rekordty kórsetip otyr, al Reseıde ınflıasııa 16,7%-ǵa jetti. Mundaı jaǵdaıda damyǵan elder aqsha-kredıt talaptaryn kúsheıtedi, bul damýshy elderdiń valıýtalaryna qysym jasaıdy. Osyǵan baılanysty Qazaqstan úshin syrtqy ınflıasııalyq jaǵdaı qolaısyz bolyp qalyptasyp otyr», dedi Ulttyq bank tóraǵasy.
