Osylaısha, aıdyń, kúnniń amanynda 12 úı birdeı órtenip, onda turyp jatqan 13 otbasy baspanasyz qaldy. Bul otbasylarynda kámelet jasqa tolmaǵan 13 bala bar. Munyń syrtynda, órt úsh jeńil kólikti, bir júk kóligin, birtalaı jeke sharýashylyq ǵımarattaryn joq qyldy. Alapat órt qalalyq aýqymdaǵy tótenshe jaǵdaı retinde tirkeldi.
9 mamyr kúni úısiz qalǵan 5 adam qaladaǵy «Dostyq» profılaktorııine ornalastyrylyp, qalǵandary týystarynyń úıin panalady. Al 10 mamyrda tańerteń qala ákimi Marat Júndibaev úıi órtengen turǵyndarmen kezdesti. Kezdesýge oblys ákiminiń úsh orynbasary qatysty.
Qala ákimdiginiń málimdeýinshe, osy kúni órt joıǵan úı-múliktiń qunyn anyqtaıtyn komıssııa qurylǵan. Komıssııa jumysyna táýelsiz sarapshylar da tartylyp otyr. Ár otbasyna 200 myń teńgeden alǵashqy qarjylaı kómek kórsetildi. Munyń syrtynda, qalalyq jumyspen qamtý bólimi áleýmettik kómek kórsetý erejesine sáıkes, órtten zııan shekken ár otbasyna
70 AEK kóleminde, ıaǵnı 214 410 teńgeden aýdarmaq.
Jergilikti kásipkerler baspanasyz qalǵan turǵyndarǵa qaraqumyq, un, makaron, taýyq eti, suıyq maı túrinde tegin azyq-túlikpen kómek kórsete bastady. Bul azyq-túlikterdi 10 mamyr kúni saǵat 15:00-de volonterler zardap shekkenderge jetkizip berdi.
– Jeti oqýshyǵa tegin ystyq tamaq, keńse taýarlary, kıim berildi. Kámeletke tolmaǵan eki stýdent qajetti kıimmen, aıaqkıimmen qamtamasyz etiledi. Sondaı-aq jer qatynastary jáne sáýlet bóliminiń zań qyzmeti órtenip ketken múlik qujattaryn qaıta qalpyna keltirý jumystaryn bastady, – dedi ákimdik ókilderi.
Tótenshe jaǵdaıdy joıý jónindegi jedel shtab jumysyn oblys ákimi Arhımed Muhambetov tikeleı baqylaýyna aldy.
Qostanaı oblysy
