Rıgadaǵy alǵashqy matchta muzaıdyn ıeleri Andreı Shýtovtyń qaqpasyna jaýapsyz bes shaıba soqty. Alǵashqy kezeńde óte belsendi oınaǵan latvııalyqtar negizgi shaıbalaryn dál osy 20 mınýttyń ishinde saldy. Qorǵanystaǵy oıynshylarymyzdyń olqylyǵynyń saldarynan bar-joǵy tórt mınýttyń ishinde qarsylastar qaqpamyzǵa úsh shaıba soǵyp ketti. 11-mınýtta Nıkolaı Elıseev esepti ashsa, arada eki mınýt ótkende Latvııa quramasy san basymdyǵyna ıe bolyp, tablodaǵy kórsetkishti 2:0-ge jetkizdi. Shaıba avtory – Karlıs Kýkshte. Al 15-mınýtta aıdyn ıeleri taǵy da san basymdyǵyn tıimdi paıdalanyp, nátıjesinde N.Elıseev dýbldiń avtory atandy.
Úziliste Iýrıı Mıhaılıstiń tıisti aqyl-keńesin tyńdap shyqqan qazaqstandyq hokkeıshiler ekinshi 20 mınýtta belsendi oınaı bastady. Qorǵaýshylar birinshi kezeńdegideı qorǵanysta asa kóp qatelik jasaǵan joq. Tek shabýyldaǵy jigitter kóp rette gol soǵatyn múmkindikti paıdalana almaı, saly sýǵa ketip jatty. Degenmen latvııalyqtar bul kezeńde de qaqpadan sańylaý tapty. 25-mınýtta Oskars Batna mergendik tanytty – 4:0. Úshinshi kezeńde de jerlesterimiz qarsylastarymen teń dárejede óner kórsetip jatqan-dy. Iý.Mıhaılıs kezdesýdiń sońǵy mınýttarynda esep aıyrmasyn qysqartý úshin táýekelge baryp, muzaıdynǵa qaqpashynyń ornyna altynshy oıynshyny shyǵardy. Matchtyń aıaqtalýyna bir sekýnd qalǵanda Andrıs Djerınsh bos qalǵan qaqpaǵa alystan soqqy jasap, komandasynyń besinshi golyn soǵyp ketti. Qorytyndy esep – 5:0.
Kezdesýden keıin ulttyq quramanyń shabýylshysy Pavel Akolzın Qazaqstan hokkeı federasııasynyń resmı saıtyna oıyn týraly pikir bildirip, jeńilistiń birneshe sebebi bar ekenin, olardyń eń bastysy – komanda oıynshylarynyń bir-birimen oınap úırenispegenin atap ótti.
«Búgingi oıyndaǵy esep eshteńege áser etpese de, jeńilis qashanda aýyr tıedi. Menińshe, biz bir-birimizben uzaq ýaqyt birge oınamaǵandyqtan, túsinisý qıyn bolyp jatyr. Sonymen qatar bizdiń quramadaǵy kóp hokkeıshi úshin maýsym erte aıaqtalyp, qajetti oıyn tájirıbesinen shyǵyp qalǵan. Birinshi kezeńdi sátsiz oınap, kóp tártip buzýǵa májbúr boldyq. Al qarsylas mundaı sátti utymdy paıdalanyp ketti. Bolashaqta mundaı qatelikterge jol berýge bolmaıdy. Ekinshi jáne úshinshi kezeńderde oıyn birshama teń dárejede ótti, tipti keı sátterde biz basymdyqqa ıe boldyq. Sebebi, biz buǵan deıin basqa arenada daıyndaldyq ta, matchty basqa muzaıdynda ótkizdik. Alǵashqy kezeńde aıaqtarymyz muzǵa úırenbeı, biraz qınaldyq. Al ekinshi kezeńnen erkin syrǵanaı bastadyq. Sondaı-aq búgin latvııalyq qaqpashynyń kúni bolǵan sııaqty. Barlyq shabýylymyzdy qaıtaryp otyrdy. Álem chempıonatynda oıynymyz bir júıege túsip, jaqsy oıyn kórsetemiz dep oılaımyn», dedi ol.
10 mamyrda ótken ekinshi joldastyq kezdesýde Iýrıı Mıhaılıs negizgi quramǵa ózgeris jasap kórdi. Birinshi mınýttan bastap qaqpany kókshetaýlyq «Arlannyń» qaqpashysy Ilıa Rýmıansev qorǵady. Sondaı-aq matchqa shyǵatyn hokkeıshiler tizimine Dmıtrıı Grens, Saıan Danııar jáne Ádil Beketaevtar endi. Biraq bul kezdesýde de jeńis buıyrmady. Birinshi oıynnyń ssenarııi qaıtalanǵan matchta muzaıdyn ıeleri alǵashqy kezeńde qaqpamyzǵa úsh, ekinshi jáne úshinshi kezeńde taǵy da bir-bir shaıba soqty. Kezdesýdiń ekinshi mınýtynda Roberts Býkart san basymdyǵy arqyly esepti ashsa, keıinnen Artýr Kýlda (13-mınýt) men Renars Krastenbergs (17-mınýt) mergendigimen kózge tústi. Al ekinshi kezeńniń 35-mınýtynda Martınsh Dzıerkals qaqpany dál kózdese, úshinshi kezeńniń 58-mınýtynda Rodrıgo Abols komandasynyń besinshi shaıbasyn soqty. Latvııa quramasynyń eki oıyndaǵy 10 shaıbasyna ekinshi matchta Nıkıta Mıhaılıs bir golmen jaýap qaıtardy. Ekinshi matchtyń qorytyndy esebi – 5:1. Osylaısha Qazaqstan quramasy álem chempıonatynyń aldyndaǵy eki joldastyq kezdesýde de jeńilip qaldy.
Matchtan keıin Qazaqstan hokkeı federasııasynyń baspasóz qyzmetine suhbat bergen bas bapker Iýrıı Mıhaılıs shabýylshy Pavel Akolzınniń oıyn qoldap, ulttyq quramadaǵy hokkeıshilerge oıyn tájirıbesi jetispeı jatqanyn atap ótti.
«Ulttyq qurama hokkeıshileri burynǵydaı bir klýbta emes, árqaısysy ártúrli komandalarda oınap kelgen soń, bir-birimen túsinisýi qıyndap, kóp hokkeıshide oıyn tájirıbesiniń azdyǵy keri áserin tıgizip jatyr. 3-4 aı muzaıdynǵa shyqpaǵan hokkeıshilerge birden oıynǵa kirisip ketý qıyn ekeni belgili. Qarsylastarymyz eki matchta da jyldam oınap, bizdiń jigitter olardyń jyldamdyǵyna ilese almaı qaldy. Sondyqtan da qaqpamyzǵa kóp gol ótkizip aldyq. Olar eki oıynda da goldyń kóp bóligin san basymdyǵyna ıe bolǵan kezde ǵana soǵyp otyrdy. Demek, bizge aldaǵy ýaqytta osy jaǵyna kóbirek kóńil bólý kerek. Ekinshi oıynnyń ekinshi jáne úshinshi kezeńinde bizdiń jigitter jıi shabýyl jasap, gol soǵýǵa tyrysty. Quramada oń ózgeris bar ekeni baıqalady», deıdi bas bapker.
Aıta keteıik, Qazaqstan quramasy 13 mamyrda bastalatyn Fınlıandııadaǵy álem chempıonatynyń alǵashqy oıynyn 14 mamyr kúni elorda ýaqytymen saǵat 15.20-da Danııa hokkeıshilerimen ótkizedi. Jeksenbi kúni Danııa quramasy Ulybrıtanııamen eki quramda eki oıyn ótkizip, ekeýinde de jeńiske jetti – 2:0, 8:0. Al toptaǵy taǵy bir qarsylasymyz Germanııa Aýstrııany utty – 3:1. Senbi kúni bizdiń toptaǵy Slovakııa men Fransııa quramalary muzaıdynda kezdesip, slovakııalyqtar 2:0 esebimen jeńiske jetti.
