Atyraýda Hıýaz Dospanova atyndaǵy stıpendııanyń alǵashqy ıegeri anyqtaldy
Atyraýda ekinshi dúnıejúzilik soǵysta áýege 300 ret kóterilip, jaýǵa qarsy urysta eren erliktiń úlgisin kórsetken qazaqtyń batyr qyzy, Halyq Qaharmany Hıýaz Dospanovanyń esimin este qaldyrý maqsatynda ıgilikti shara qolǵa alyndy. Oǵan ardager Qatımolla Rızýanov tóraǵalyq etetin oblystyq ardagerler keńesi uıytqy boldy.
– Biz bul máseleni byltyrdan beri oılastyryp, demeýshiler izdestire bastaǵanbyz. Maqsat –túngi áskerı áýe joryǵynda jaý uıasyn birneshe ret bombalap, qaıtalanbas erligimen tanylǵan Hıýaz Dospanovanyń qaharmandyq minezi men erlik dastanyn, jalpy, qazaq halqynyń erjúrektiligin jas urpaq sanasyna sińire berý. Ásirese, erligi men ójettiligi, qaıratkerligi turǵysynan nasıhattalýy kemshin túsip júrgen Hıýaz Dospanovany jas urpaq umytpasa eken deımiz. Osy oraıda, qazaqtyń qaharman qyzynyń keýde músini Atyraýdaǵy halyqaralyq áýejaı aldyna aýystyrylǵanyn qalar edik. Sonymen birge, áýejaıdan qalaǵa deıingi jolǵa Hıýaz Dospanovanyń atyn berýdi kesheýildetpegen oryndy bolar edi. Buryn qaharman qyzdyń esimi muz aıdyny saraıyna beriledi degenmen, bul másele de áli kúnge oń sheshimin tapqan joq. Degenmen, biz jaqynda demeýshilermen keńesip, Hıýaz Dospanova atyndaǵy arnaýly stıpendııany taǵaıyndaýdy uıǵardyq. Arnaıy qurylǵan komıssııanyń talqylaýynan keıin batyr atyndaǵy arnaýly stıpendııanyń alǵashqy ıegerin anyqtadyq, – dedi gazet tilshisine oblystyq ardagerler keńesiniń tóraǵasy Qatımolla Rızýanov.
Halyq Qaharmany Hıýaz Dospanova atyndaǵy arnaýly stıpendııa H.Dosmuhamedov atyndaǵy Atyraý memlekettik ýnıversıtetiniń stýdenti Gúlnáz Jolboldyqyzyna berildi. Bir ereksheligi, áskerı ushqysh atyndaǵy stıpendııaǵa ıe bolǵan stýdent atalǵan ýnıversıtette «Alǵashqy áskerı daıyndyq» mamandyǵynda oqıdy.
Joldasbek ShО́PEǴUL,
«Egemen Qazaqstan».
Atyraý oblysy.
––––––––––––
Sýrette: G.Jolboldyqyzy men Q.Rızýanov.
