Ardagerlerge arnalǵan kómek

Adamzatty fashıstik ezgiden azat etken Uly Jeńistiń 69 jyldyǵy jaqyndap keledi. Osy aıtýly merekege oraı, Uly Otan soǵysyna qatysýshylar men múgedekterge jan-jaqty qurmet kórsetý sharalary bastaý aldy. Bıyl elordada Uly Otan soǵysyndaǵy Jeńistiń 69 jyldyǵyn atap ótý aıasynda jeke sanattaǵy azamattarǵa jergilikti bıýdjet qarjysy esebinen bir rettik aqshalaı tólem retinde áleýmettik qoldaý kórsetiledi. Jeńis kúnine oraı qazirgi tańda Astanada turatyn 258 Uly Otan soǵysyna qatysýshylar men múgedekterge 150 myń teńgeden bir rettik kómek kórsetý sharasy qarastyrylýda. Bul týraly Astana qalasy ákimi apparatynyń baspasóz qyzmeti habarlady. Qalalyq jumyspen qamtý jáne áleýmettik baǵdarlamalar basqarmasynyń málimdemesinde: «Jeńis kúnine oraı arnaýly memlekettik járdemaqy alýshylar ishinen tómende kórsetilgen sanattarǵa materıaldyq kómek kórsetý josparlanýda. 1941-1945 jyldary Uly Otan soǵysyna qatysýshylar men múgedekterge 150 myń teńgeden; «Uly Otan soǵysynyń qatysýshylary men múgedekterine jáne solarǵa teńestirilgen adamdarǵa beri­le­tin jeńildikter men olardy áleýmettik qorǵaý týraly» Qazaqstan Respýblıkasy Za­ńynyń 6, 8-baptarynda már­tebesi berilgen Uly Otan soǵy­sy­nyń qatysýshylary men mú­gedekterine jeńildikter men ke­pilder boıynsha teńestirilgen adam­darǵa 20 myń teńgeden tó­lenedi», dep atap kórsetilgen. So­nymen qatar, jeńildikter men kepildikter boıynsha so­ǵys­qa qatysýshylarǵa teńes­­ti­ril­gen basqa da sanattaǵy adam­­darǵa, sonyń ishinde soǵys jyl­daryndaǵy tyl eńbek­kerleri, qaza bolǵan áskerı qyz­met­shilerdiń otbasylaryna 10 myń teńgeden bir rettik kómek kórsetiledi. Jylqybaı JAǴYPARULY, «Egemen Qazaqstan».