Senator áskerı mekemeniń tyńdaýshylary men professorlyq-oqytýshylyq quramyna Konstıtýsııaǵa ózgerister engizý jónindegi aldaǵy referendým týraly aıtyp, túzetýler Negizgi Zań baptarynyń úshten birine áser etetinin aıtty.
«Atap aıtqanda, Prezıdent ókilettikterin júzege asyrý kezeńinde onyń saıası partııalarǵa múshe bolýyna tyıym salynady. Memlekettik organdarda jáne kvazımemlekettik sektor sýbektilerinde Prezıdenttiń jaqyn týystaryna basshy laýazymdardy atqarýǵa tyıym salynady. Sondaı-aq ókildi organdardyń ókilettikterin qalyptastyrý jáne kúsheıtý tártibi demokratııalandyrylatyn bolady. Sonymen qatar tıisti zań jobasynda Konstıtýsııada jer jáne onyń qoınaýy, sý, ósimdik álemi jáne basqa da tabıǵı resýrstar Qazaqstan halqyna tıesili ekendigi týraly normany bekitý týraly mańyzdy mazmun jazylǵan», dedi senator M.Qul-Muhammed.
Kezdesý barysynda áskerı qyzmetshiler tarapynan basqa da konstıtýsııalyq ózgeristerge qatysty, onyń ishinde azamattardyń quqyqtaryn qorǵaý tetigine baılanysty máseleler aıtyldy. Senator suraqtarǵa jaýap bere otyryp, qoldanystaǵy sharalar aıtarlyqtaı kúsheıtiletinin atap ótti.
«Azamattardyń quqyqtaryn qorǵaý tetigin kúsheıtý maqsatynda Konstıtýsııalyq sot qurylady, onda azamattar ózderiniń quqyqtary men bostandyqtaryn tikeleı qozǵaıtyn normatıvtik-quqyqtyq aktilerdiń Negizgi Zańǵa sáıkestigine ótinish jasaı alady. Budan bylaı ólim jazasyna tolyqtaı tyıym salynady, Adam quqyqtary jónindegi ýákildiń mártebesi kóteriledi, onyń qyzmeti Konstıtýsııalyq zańmen retteledi», dedi senator.
Kezdesýge qatysýshylar sonymen qatar Konstıtýsııaǵa halyqtyń eldi basqarýǵa qatysýyn arttyrý, Parlamenttiń róli men mártebesin ózgertý jáne basqa da bólikterindegi ózgeristerdi talqylady.
