A tobynyń jeńimpazy men S tobynyń úzdigi, al V tobynyń myqtysy men D tobynyń jeńimpazy fınalǵa beriler joldama úshin talaspaq. Olar: K.Ahmetov atyndaǵy olımpıada rezerviniń respýblıkalyq mamandandyrylǵan mektep-ınternat-kolledji (Almaty) – Jalańtós Bahadúr atyndaǵy olımpıada rezerviniń respýblıkalyq mamandandyrylǵan mektep-ınternat-kolledji (Qyzylorda obl); Q.Muńaıtpasuly atyndaǵy olımpıada rezerviniń respýblıkalyq mamandandyrylǵan mektep-ınternat-kolledji (Nur-Sultan) – Á.Moldaǵulova atyndaǵy sport ınternaty (Qaraǵandy obl).
Atalǵan oqý oryndarynyń 2006-2007 jyly dúnıege kelgen shákirtteri boks, dzıýdo, grek-rım jáne erkin kúresten sheberlik baıqasady. Mamyrdyń basynda ótken toptyq kezeńge barlyǵy 17 komanda qatysty. Olar Nur-Sultan, Almaty, Aqtóbe men Taraz qalalarynda úzdikti anyqtady.
Aıta keteıik, Mádenıet jáne sport mınıstriniń kýbogy bıyl alǵash ret ótip jatyr. Mınıstr kýbogynyń jalpy júlde qory 10 mıllıon teńge. 1-oryn alǵan komandaǵa – 5 mln, 2-orynǵa – 3 mln, 3 orynǵa 2 mln teńge beriledi.
Budan bólek, tóreshiler bokstan – «Úzdik tehnıkasy úshin», erkin kúresten – «Jeńiske degen erik-jigeri úshin», dzıýdodan – «Úzdik ádis úshin», grek-rım kúresinen «Kórermenderdiń kózaıymy úshin» atalymdarynda jeńimpazdy anyqtaıdy.
Balalar jyly aıasynda uıymdastyrylyp jatqan keshendi báseke balalar men jasóspirimder arasynda sportty nasıhattaýǵa baǵyttalǵan. Mınıstr kýbogynyń búgingi qatysýshylary erteńgi el sportynyń tý ustaýshylary bolýlary ábden múmkin.
