Jýyrda oblys ákimi Ábilqaıyr Sqaqov Canarax Trading LLP kompanııasynyń quryltaıshylary Nıtıng Bhatnagar jáne Ibrahım Ahmet Abdolla ál Hammadımen kezdesti. Á.Sqaqov Memleket basshysy Qasym-Jomart Toqaevtyń ınvestısııalyq jobalardy iske asyrýdy údetý týraly tapsyrmasyna sáıkes óńirlik mańyzy bar ındýstrııalyq aımaqty qurý boıynsha jumystar atqarylyp jatqanyn atap ótti.
– Bul bizdiń birinshi kezdesý emes. О́tken jyldyń naýryz aıynda Abý-Dabıde bizdiń ókilderimiz ózara yntymaqtastyq týraly memorandýmǵa qol qoıǵan edi. Budan keıin Ekibastuz qalasynda óńirlik ındýstrııalyq aımaq quryldy. Shaǵyn ındýstrııalyq aımaqtyń jetekshi ınvestory retinde «Canarax Trading» kompanııasy shaqyrylyp otyr. Ekibastuz qalasynyń keshendi damý josparyn bekitý kezinde kómir hımııasyn damytýǵa basymdyq berdik. Biz úshin kómir – Ekibastuzdyń basty resýrsy jáne shıkizat bazasy, – dedi Á.Sqaqov.
Bul rette ınvestorlarǵa kómir hımııasyn damytý boıynsha kómir kúlin qaldyqsyz qaıta óńdeý tehnologııasynyń, shaıyndy sýlardy tazalaý úshin ardsorbentter ázirleýdiń daıyn patentteri bar hımııa jáne kómir ınstıtýtymen áriptestik baılanys qurý usynyldy.
Kompanııanyń quryltaıshysy Nıtın Bhatnagar pandemııa kezeńinde Qazaqstanmen baılanys ornatý qıynǵa soqqanyn, qazir birlesken jobalardy júzege asyrýǵa múmkindik mol ekenin aıtty. «Biz ındýstrııalyq aımaqty júzege asyrý boıynsha jumys júrgizip, áleýetti ınvestorlarmen kezdestik. Ekibastuzdaǵy shaǵyn ındýstrııalyq aımaqtyń tabysty jumys isteýin mindetimizge alamyz», dedi ol.
Qazirdiń ózinde ınvestorlar Ekibastuz qalasynda jáne «Astana» halyqaralyq qarjy ortalyǵynda «Canarax Ekibastuz Industrial Zone» JShS-in tirkep úlgergen. Keıin ındýstrııalyq aımaqtyń basqarýshy kompanııasy retinde jumysyn jalǵastyratyn bolady.
Pavlodar oblysy
