Áleýmettik jelide Qostanaı oblysy Jangeldın aýdany Sarytúbek aýylynda ornalasqan Ahmet Baıtursynulynyń týǵan úıiniń súrilip, qaıta salynyp jatqany túsirilgen beınejazba tarady. Avtordyń aıtýynsha, qurylyspen aınalysyp jatqan merdiger jaýapsyzdyq tanytyp otyr.
«Búgin Qostanaı oblysy, Jangeldın aýdany, Sarytúbektegi Ahmet atanyń túgel súrilip, qaıta turǵyzylǵaly jatqan qurylys basyna barǵanbyz. Qurylys jóninde jarııalanǵan tenderdi syrttan kelgen jigitter utyp alǵan eken. Al myna bastaǵan qurlystaryna múlde kóńil tolmaıdy. Oılaryna eren tulǵaǵa áreń degende, zaryǵyp jetip salynyp jatqan dúnıe ekeni kirip te shyqpaıdy. Áńgimelerine qarasań, týra bir jaı saraı turǵyzyp jatqan sııaqty. Proektini oqıyq, syzbasynda qaı jerinde qandaı materıal qajet dep jazypty, kóreıik desek, kórsetpeıdi. Al quıǵan fýndamentteri múlde talapqa saı emes. Aýylda qoranyń irgetasyna salynatyn tastardan qalap jatyr. Qabyrǵasyna degen kirpishteriniń de sapasy tómen. Ári ketse eki-úsh jylda myna irgetas pen myna kirpish jarylady.
Qurylys jaıyn Aqkóldegi Qoja aǵamyz aýdan ákimine eskertken. Biraq aýdan ákimi de qulyqsyz sııaqty. Eki aýyldyń ákimderiniń tipti bas qatyrǵylary kelmeıdi. Eli úshin qurban bolǵan atamyzǵa úkimetten budan keıin qarjy bólinip, birdeńe turǵyzylady deý qıyn. Osynyń ózin oıbaılap júrip turǵyzaıyn dep jatqanda myna jasalyp jatqany sumdyqtyń ózi, naǵyz masqara! Bólingen qarajat qurlysshylarǵa tegis jetpegen bolar, tenderdiń sondaıy bar ǵoı», dedi beınejazba avtory.
Ǵalamtorda kóptiń talqysynda túsken osy oqıǵaǵa baılanysty Qostanaı oblysy ákimdiginiń baspasóz qyzmeti pikir bildirdi.
«Búgin Qostanaı oblysy Jangeldın aýdany Ahmet Baıtursynuly aýylyndaǵy Ahmet Baıtursynulynyń týǵan úıin qaıta jańǵyrtý jumystaryna qatysty syn-pikirler kelip tústi. Alash arysynyń 150 jyldyq mereıtoıy qarsańynda Jangeldın aýdanynyń ákimdigi jóndeý jumystaryna baıqaý jarııalap, merdigerdi anyqtap, qurylys jumystaryn bastaǵan. Alaıda oryn alǵan jaǵdaıǵa baılanysty oblys ákimi Arhımed Begejanuly Muhambetov atalmysh úıdiń qurylys jumystaryn toqtatyp, aýdan ákimine eskertý jasady», dep jazdy Qostanaı oblysy ákimdigi baspasóz qyzmetiniń jetekshisi Kenje Qonysbaı.
Sondaı-aq ol aldaǵy aptada oblys ákimi Arhımed Muhambetovtyń Ahmet Baıtursynulynyń aýylyna jumys sapary josparlanǵanyn jetkizdi.
Sapar aıasynda qurylys jumystaryna qatysty usynystardy tyńdap, tıisti sheshim qabyldaıtyn bolady.
