Bar jaqsymyz – balalarǵa

Jalpy, ataýly jylda atqarylatyn is-sharalar reti Úkimettiń arnaıy qaýlysymen 7 baǵyt boıynsha júrgizilýde. Olardyń qatarynda «Bilimdi bala», «Otbasy – qaýipsiz meken», «Deni saý bala», «Jetimsiz el», «Jaıly meken», «Bala qorgay», «Bala_time.kz» sııaqty negizgi josparlardy qamtý mindeti tur. Al aımaqta qolǵa alynǵan is-sharanyń bir baǵyty bilim salasyna qatysty bolyp otyr.

– Prezıdent bul jyldy tek urandap nemese mereke túrinde ǵana ótkizýdi emes, balalardy qorǵaý maqsatynda densaýlyq saqtaý, bilim berý jáne áleýmettik qamsyzdandyrý salasynda naqty is-sharalar jasaý kerektigin tapsyrdy. Osyǵan oraı oblysta is-sharalar jos­pary bekitilgen, – dedi oblystyq bilim basqarmasy basshysynyń orynbasary Aıjan Adambekova.

Onyń aıtýynsha, bul balalardyń sapaly bilim alýyna, tolyqqandy qosymsha oqýmen qamtylýyna, densaýlyǵyn nyǵaıtýǵa, quqyqtaryn iske asyrýǵa, otbasylyq jáne adamgershilik-rýhanı qundylyqtardy qalyptastyrýǵa baǵyttalyp otyr. Oblysta Balalar jylyn ótkizý aıasynda 5 myńnan astam is-shara qarastyrylsa, bul maqsatqa jergilikti bıýdjetten 7 mlrd teńgeden astam qarjy bólinipti.

Bıyl balalar ıgiligi úshin beriletin 13 mek­teptiń qurylysyn aıaqtaý josparlanýda. Munan bólek Eńbekshiqazaq kópsalaly aýdanaralyq aýrýhanasynyń bazasynda «Qamqorlyq» ońal­tý ortalyǵy ashylmaq. Ortalyqta neıro-ortope­dııalyq, serebraldy sal aýrýy bar balalardy ońaltýdyń úzdik ádistemeleri men zamanaýı tásil­deri engizilgen. Jyl sońyna deıin 600 balany qabyldaý josparlanǵan. Jalpy, aımaqtaǵy múmkindigi shekteýli 58 bala ýaqtyly saýyqtyrý úshin Nur-Sultan qalasynyń «Balalardy ońal­týdyń ulttyq ortalyǵyna» jiberilgen. Bala densaý­lyǵyna kóńil bólý isi oblysta oń baǵytta órbip otyr. Qazir aımaq­ta 11 ońaltý ortalyǵy jumys isteıdi. Onyń tór­teýi taza memlekettik mekeme eken. Mundaı ortalyq­tarda qyzmet alý­shy­larǵa áleýmettik-mádenıet, áleýmettik-ekono­mıka, áleýmettik-psıhologııa, áleý­mettik-medısına, áleý­mettik-quqyq salalary boıynsha kómek beriledi.

«Bar jaqsylyq – balalarǵa» degendeı, aımaqtaǵy jasóspirimderdi rýhanı turǵyda qoldaý árdaıym nazarda. Oblystyq tarıhı-ólketaný murajaılary men mýzeılerge jetim balalar men ata-anasy­nyń qamqorlyǵynsyz qalǵan, az qamtylǵan, kópbala­ly ot­basylardan shyqqan jetkinshekterge tegin kórme-ekskýrsııalar uıymdastyrylýda. Jaqynda «Qaıyrym­dy ult» respýblıkalyq qaıyrymdylyq aksııasy aıasynda «Aınalaıyn» balalar úıi men káme­letke tolmaǵandardy beıimdeý ortalyǵynyń eki júz­den astam tárbıelenýshisi men múmkindigi shek­teýli balalarǵa merekelik konsert jáne dastar­qan uıymdastyrylǵan. Jetim jáne ata-ana qam­qor­lyǵynsyz qalǵan balalarǵa arnalǵan meke­me­lerdiń 210 tárbıelenýshisine oıynshyqtar, sport­tyq ınventarlar jáne basqa syılyqtar tabys etil­gen. Al B.Rımova atyndaǵy drama teatry 860 balaǵa qaıyrym­dylyq qoıylymdaryn usyndy. «Aına­laıyn» jáne oblystyq №1 balalar úıleriniń 194 tár­bıelenýshisi úshin demeýshiler tarapynan mereke­lik dastarqan uıymdastyrylyp, syılyqtar ta­bys etildi, bul sharaǵa 2 mln-nan astam qarajat jumsaldy.

Oblysta bala quqyǵyn júzege asyrý, otbasy­lyq jáne adamgershilik-rýhanı qundylyqtardy qalyptastyrý maqsatynda sýret, mánerlep oqý, plakat, patrıottyq ánder baıqaýy, ashyq sabaq, tárbıe saǵaty, aksııa, ádebı oqylym, murajaılarǵa ekskýrsııa, kórme, festıval, slet, ata-analardyń qatysýymen dóńgelek ústel, kezdesýler ótti. Is-sharalar memlekettik jáne úkimettik emes uıymdar, demeýshiler, mesenattar, qoǵamdyq uıymdardyń qatysýymen uıymdastyrylýda. Bul atalǵan sharalar «Balalar jyly» aıasynda turaqty jalǵasyn tappaq.

Almaty oblysy