Jeńilisten kóz ashpaı tur

Qazaqstandyq hokkeıshiler tórtinshi týrda shaıbaly hok­keıden álem chempıonaty tarıhynda 27 márte bas júl­deni jeńip alǵan Kanada qura­ma­­symen kezdesti. Olar byltyr Latvııa astanasy – Rıgada uıym­dastyrylǵan ja­handyq dodada top jarǵan bolatyn. Sol chempıonatta da eki el­diń hokkeıshileri bir topta óner kór­setip, kanadalyqtar 4:2 ese­bimen jeńiske jetken-di. Bıylǵy matchta da Kanada quramasynyń mereıi ústem boldy – 6:3.

Kezdesýdiń alǵashqy keze­ńinde qazaqstandyq hokkeıshiler qarsylastardyń ataǵynan esh qaımyqpaı, jeńis úshin baryn saldy. Tipti match barysynda Iýrıı Mıhaılıs shákirtteri eki ret esepte alǵa shyǵyp alǵanyn aıta ketken jón. Aldymen oıyn­nyń úshinshi mınýtynda Egor Petýhov Álıhan Ásetovtiń ta­masha pasynan keıin esepti ashty. Alaıda arada bir mınýttan sál asa ýaqyt ótkende kanadalyqtar Dılan Kozenstiń soqqan shaıbasy arqyly tara­zy basyn teńestirip ketti. Keıinnen kanadalyq hokkeı­shiler oıyn tártibin jıi buza bastady. San basymdyǵyna ıe bolǵan Qazaq­stan quramasy 13-mınýtta qaıtadan esepte alǵa shyqty. Bul joly Arkadıı Shestakov mergendigimen kózge tústi. Bir­aq arada kóp ýaqyt ótpeı Ka­nada hokkeıshileri taǵy da esepti teńestirip ketti. Andreı Shýtov qaıtarǵan shaı­baǵa birinshi jetken Dreık Ba­terson komandasynyń ekinshi shaıbasyn soqty. Birinshi kezeńniń aıaqtalýyna eki mınýt qalǵanda bul joly qarsylas komanda oıyn­shylary san basymdyǵyna ıe bolyp, kezdesýde alǵash ret esepte alǵa shyqty. Shaıbanyń avtory – Adam Laýrı. Osylaısha, alǵashqy kezeńde Kanada kambek jasady.

Ekinshi kezeńniń bel ortasynan aýǵanda kanadalyq Deımon Sıverson Andreı Shý­tovpen birge-bir shyǵyp, qaqpa­shymyzdan op-ońaı aılasyn asyrdy. Al úshinshi kezeńniń 47-mınýtynda Kırıll Savıskıı mergendik tanytyp, esep aıyrmasyn qysqartýǵa múmkindik alǵan-dy. Alaıda matchtyń so­ńyna deıin Dılan Kozens taǵy eki shaıba soǵyp, oıynnyń núk­tesin qoıdy.

Araǵa bir kún salyp Qazaq­stan quramasy besinshi týrda Slovakııa hokkeıshilerimen muzaıdynda sheberlik baıqasty. Dál osy týrda Qazaqstan qura­masynyń upaı alatyn tamasha múmkindigi bar edi. Sebebi Slo­vakııa alǵashqy týrda Fransııany (4:2) jeńgenimen, keıingi úsh týrda Germanııa (1:2), Kanada (1:5) jáne Shveısarııadan (3:5) jeńilgen-di. Iаǵnı quramalardyń kúshteri teń edi.

Soǵan qaramastan kezdesýdiń esebin birinshi bolyp Slovakııa oıynshylary ashty. Birinshi kezeńniń 13-mınýtynda Álıhan Ásetovtiń qateliginen keıin shaı­baǵa ıelik etken Samýel Takach­tan tez arada qaqpa ma­ńaıynda turǵan áriptesi Andreı Kollarge pas shyǵardy. Kollar óz kezeginde Andreı Shýtov qorǵaǵan qaqpany dál kózdep, attasyn qapy qaldyrdy. Alaıda slovakııalyq jankúıerlerdiń qýanyshy uzaqqa sozylmady. 15-mınýtta Iýrıı Mıhaılıs shákirtteri san basymdyǵyn júzege asyryp, tarazy basyn teńestirdi – 1:1. Djessı Bleı­­kerdiń kók syzyqtyń b­o­ıynan qaqpaǵa jasaǵan joı­qyn soqqysyn Slovakııa qura­masynyń qaqpashysy qaıtar­ǵanymen, keıin serpilgen shaı­baǵa Kırıll Panıýkov birinshi jetti. Arada eki mınýt ótkende jerlesterimiz taǵy da san ba­symdyǵyna ıe bolyp, bul joly da múmkindikti múlt jibergen joq. Bul shaıba da dál alǵashqy goldyń ssenarııimen soǵyldy. Roman Starchenkonyń sol qap­taldan jasaǵan soqqysyn qaq­pashy qaıtarǵanymen, oń qap­taldan shabýyldaǵan Dmıtrıı Shevchenkonyń soqqysyna toıtarys bere almady – 2:1.

Alaıda ekinshi kezeńniń orta tusyna kelgende Pavel Akolzın oıyn erejesin buzǵany úshin tóreshi tarapynan bes mınýt aıyp­pen jazalanyp, áriptesterin qıyn jaǵdaıǵa qaldyrdy. Saldarynan oıynnyń 30-mınýtynda Martın Fegervary tarazy basyn teńestirse, 34-mınýtta Adamý Lıshký komandasyn esepte alǵa shyǵardy. Al 35-mınýtta tóreshiler qazaqstandyq komandaǵa qatysty taǵy da tár­tiptik shara qoldanyp, Andreı Shýtov qaqpasyna býllıt ta­ǵaıyndady. Ony óz kezeginde Iýraı Slafkovskı aına qatesiz oryndap, esepti – 4:2-ge jetkizdi.

Úshinshi kezeńniń basynda Qazaqstan quramasy Kı­rıll Panıýkovtyń arqasynda jyl­dam esep aıyrmasyn qys­qartqanymen, match sońyna deıin Iýrıı Mıhaılıs shákirtteriniń tarazy basyn teńestirýge shamasy jetpedi. Qorytyndy esep – 3:4. Osylaısha, Qazaqstan quramasy qatarynan besinshi márte jeńilistiń kermek dámin tatýǵa májbúr boldy.

«A» tobynyń besinshi týrynan keıin Shveısarııa quramasy 15 upaımen jeke-dara kósh bastady. Al 12 upaıy bar Kanada men Germanııa ekinshi jáne úshinshi oryndardy bólisip tur, 9 upaı­dan ıelengen Danııa men Slo­vakııa sáıkesinshe besinshi jáne altynshy orynǵa jaıǵasqan. Son­daı-aq eki jeńisi bar Fransııa altynshy satyǵa jaıǵassa (5 upaı), dál osy «úsh jolaqty» eldiń hokkeıshilerinen overtaım­da jeńilgen Italııa bir upaı enshi­lep, jetinshi orynǵa turaqtady.

«V» tobynda Fınlıandııa 16 upaımen kósh bastap tur. Keıingi oryndarǵa Shvesııa (12 upaı), Chehııa (10), AQSh (10), Latvııa (5), Norvegııa (5), Aýstrııa (4), Ulybrıtanııa (1) jaıǵasty.

Jerlesterimiz keshe toptyq kezeńniń altynshy týry aıasynda Germanııa quramasymen kezdesti.