Medısına • 23 Mamyr, 2022

Medısınalyq týrızmniń damýyna múmkindik mol

124 ret kórsetildi

Pandemııa kezinde elimizge emdelýge kelgen sheteldik pasıent­ter­diń bolǵanyn, onyń naqty mysaldaryn oqyrmanmen bólis­ken­biz. Al sońǵy kezde TMD aýmaǵynda bolǵan oqıǵalar otandyq medısınanyń bir tarmaǵynyń damı túsýine túrtki bolyp otyr. Sebebi kórshi memleketterdegi, onyń ishinde keń­se­sin Máskeýde ornalastyrǵan sheteldik klınıkalar qazir ókil­dik­te­rin Almatyǵa kóshirýge májbúr.

 

Qysqasy, qazirgi ahýalǵa sáı­kes jyl sońyna deıin Qazaq­stanǵa 10 myńnan astam medı­sı­nalyq týrıst kelmek. Bári demesek te, Almaty aýrýhanalarynda kórsetiletin medısınalyq qyz­met­tiń deni halyqaralyq stan­dart­tardan qalyspaıtynyn aıta ketken jón.

Osynyń barlyǵy Almatyda medı­sınalyq týrızm boıynsha al­ǵashqy halyqaralyq vorkshop ót­kizýge muryndyq boldy. «Vork­­shop» dep otyrǵanymyz – fo­rýmnan kishi, jármeńke, tusaý­ke­ser, kórme túrindegi jıyn. Al el­degi medısınalyq vorkshop 93 jyl­dyq tarıhy men tájirıbesi bar, el aýzynda áli de «Sovmınka» degen ataýmen júrgen Prezıdent is basqarmasy medısınalyq orta­ly­ǵy – Ortalyq klınıkalyq aýrý­hanasynda ótti. Qalaı desek te, osy­naý is-shara qazaqstandyq medısınaǵa suranys bar ekenin jáne álemdik medısınalyq tý­rızm­niń geografııasy ózgere bas­ta­ǵanyn aıǵaqtaıdy.

Aıtqandaı, osydan buryn Belarýsta ótken jıynǵa Grýzııa, Túrkııa, Iran, Ázerbaıjan, Qyr­ǵyzstan, Tájikstan men Reseı ókil­deri qatysqan eken. Al Al­ma­­tyda konferensııa túrinde ótken is-sharaǵa Grýzııa, Túrkııa, Iran, Ázerbaıjan, Qyrǵyzstan, Tá­jikstan, Belarýs pen Reseı ókil­deri, sheteldik jáne otandyq klınıkalar, týrıstik agenttikter, saq­t­andyrý, avıa jáne týrıstik kom­panııalary keldi.

Prezıdent is basqarmasy me­dı­­sı­nalyq ortalyǵy basshysy­nyń orynbasary Jandos Juma­be­kov vorkshoptyń ashylýynda medısınalyq kóshpeli týrızm áli de tolyq damymaǵanyn, alaı­da aınaladaǵy oqıǵalar Qazaq­stan­nyń áleýetin keńeıtýge septesip jat­qanyn atap ótti.

«Almaty – respýblıkamyzdyń eń iri megapolısi. Munda qalalyq qo­ǵamdyq densaýlyq basqar­ma­­­syna qarasty 76 medısına­lyq uıym shoǵyrlanǵan. Onyń ústine 13 respýblıkalyq deń­geı­degi medısınalyq uıym, 2 medı­sı­na­lyq joǵary oqý orny, den­saýlyq saqtaý júıesine qyzmet­kerlerdi da­ıyndaıtyn 14 medısı­na­lyq kol­ledj ben 200-den astam jeke medısınalyq uıym da osy qalada ornalasqan. Almatyda trans­plantologııa, endoprotezdeý, kardıohırýrgııa salasynda joǵary mamandandyrylǵan medısınalyq kómek kórsetýmen aınalysatyn jeke medısınalyq uıymdar bar ekenin atap ótý kerek. Almatydaǵy aýrýhanalarda emdelip jatqan naýqastardyń 25 paıyzy basqa qaladan ke­le­di», dedi Almaty qalasy qo­ǵam­­dyq densaýlyq bas­qar­ma­sy bas­shy­synyń orynbasary Svetlana Sultanǵazıeva.

Bıylǵy tórt aıda Ortalyq klı­nıkalyq aýrýhanasynda júz­den astam, al byltyr 500-deı sheteldik týrıst emdeldi.

– Qazaqstanǵa keletin me­dı­­sı­na­­lyq týrısterdiń 15%-y bizdiń aýrýhanada emdeledi. Bul – óte jaqsy kórsetkish. Bıyl bizde arıtmologııa ortalyǵy ashyldy jáne TMKKK men MÁMS kvotasy arqyly Parkınson dertine dýshar bolǵandarǵa alǵashqy operasııalar jasadyq. Ári OKA bazasynda Parkınson aýrýyn hırýrgııalyq jolmen emdeıtin ortalyq ashyldy. Osy vorkshop arqyly jylyna bizge 700-750 sheteldik pasıent júginedi dep josparlap otyrmyz. Tájirıbe kórsetip otyr­­ǵandaı, olardy neırohırýr­gııa, arıtmologııa, Parkınson aýr­ýy, kar­dıologııa, stomatolo­gııa em­deri qyzyqtyrady. Bú­­gin­gi tań­da Qazaqstan tıisti deń­geı­de jáne baǵasy jaǵynan Eýro­padan álde­neshe ese tómen medısınalyq qyz­met­tiń barlyq túrin kórsete alady, – dedi «Orta­lyq klınıkalyq aýrýhanasy» AQ prezıdenti Rýstam Albaev.

Sol sııaqty №4 qalalyq klı­nı­kalyq aýrýhanasy da medı­sı­nalyq jáne saýyqtyrý týrız­mine qatysty alǵashqy halyq­aralyq semınarda belsendilik tanytty.

– Bul is-sharanyń bizdiń aýrý­ha­­na úshin de mańyzy zor. №4 qalalyq klınıkalyq aýrýhana trav­matologııalyq-orto­pe­dııalyq kómek kórsetýmen qa­tar, kom­býs­tıo­­logııa salasynda je­tek­shi rólge ıe. Klınıka ujy­my­nyń jambas, tize, ıyq aýys­ty­rýda úlken tájirıbesi bar. 10 jyl ishin­de bizde 16 myń endoprotezdeý ope­rasııasy jasaldy. Kapsýla-baılanys qurylymdarynyń art­ro­­s­kopııalyq re­kon­strýk­tıv­tik hırýr­gııasy (ıyq, shyn­taq, tize, tobyq býyndary), ınter­ven­sııa­lyq hırýrgııada kadr­lar qu­ramy ha­lyq­aralyq stan­dart­tar­ǵa saı. Bizdiń mamandar AQSh, Izraıl, Japonııa, Qytaı men Eýropa el­de­rinde oqýdan ótti, – dedi №4 qa­la­lyq klınıkalyq aýrýhana bas dárigeriniń orynbasary Eldes Súgir.

2021 jyly aýrýhanaǵa medı­sı­­nalyq qyzmet alý úshin 100 myńnan astam adam júgingen. Aýrýhanada 23 myńnan astam naýqas emdelse, hırýrgter jylyna 12 myńǵa jýyq operasııa jasaıdy.

№4 qalalyq klınıkalyq aýrýhanasy vorkshopta travmatologııa, ortopedııa, kúrdeli ja­ra­qattar, hırýrgııa, gıneko­logııa, kardıologııa, ınter­ven­sııalyq kardıo/neırohırýrgııa, reabılıtasııa, ýrologııa men kombýstıologııa sala­laryndaǵy medısınalyq qyz­met­terdi usynýǵa daıyn eken­digin málimdedi.

Eki kún qatarynan ótken B2b for­matyndaǵy kezdesýler nátı­jesiz emes. Otandyq klınıkalar men medısınalyq týragentter she­teldik emdelýshilerge qyzmet kór­setýdiń keleshegin talqylaýǵa qol jetkizdi. Klınıkalar ózderin nasıhattap, túrli kelisimsharttarǵa qol jetkizýge, tájirıbe almasýǵa umtyldy.

– Ádette qazaqstandyqtar jaq­­­­sy emdelý úshin basqa elderge ba­­ra­tyn. Qazir jaǵdaı ózgerip jatyr. Qazaqstandy da qazir tolyq tekserýden ótýge jáne operasııa jasatýǵa bolatyn el retinde qa­raý­ǵa bolady, – deıdi Túrkııadan kelgen Famax Medical Tourism medı­sınalyq keńesshisi Ilkın Babaev.

Medısınalyq semınardyń kelesi kúni Universal Health Expert uıymdastyrýshylary Almaty klı­nıkalaryn aralap, ózara yn­ty­maq­tastyq memorandýmyna qol qoıý rásimderin ótkizdi. Olar me­dı­sınalyq vorkshop ótkizýdi dás­túrge aınaldyrýdy josparlap otyr.

 

ALMATY

Sońǵy jańalyqtar

TúrkPA-nyń ataýy ózgeredi

Parlament • Keshe

Almaty joldaryn sý basty

Aımaqtar • Keshe

Álemde altyn arzandady

Álem • Keshe

Uqsas jańalyqtar