Negizi salyq túsimderi boıynsha bekitilgen jospar – 4 466,4 mlrd teńge bolsa, ol 450,8 mlrd teńgege artyq oryndalyp, 4 917,2 mlrd teńgeni qurady. Bul ótken jylǵy sáıkes kezeńmen salystyrǵanda 1,6 ese nemese 1 873,5 mlrd teńgege kóp. Sonyń ishinde respýblıkalyq bıýdjet 100,7%-ǵa oryndaldy, deıdi mamandar. Aıtalyq, jospar boıynsha 3 290,9 mlrd teńge túsýi kerek bolsa, ol 23,9 mlrd teńgege asyra oryndalyp, 3 314,8 mlrd teńge tústi. Bul da byltyrǵy osy kezeńmen salystyrǵanda 1,8 ese nemese 1 494,5 mlrd teńgege ósken.
Al jergilikti bıýdjet 136,3%-ǵa oryndalǵan. Jospar boıynsha 1 175,5 mlrd teńge bolsa, ol 427,0 mlrd teńgege artyq jáne túsken túsim – 1 602,5 mlrd teńge. 2021 jylǵy uqsas kezeńmen salystyrǵanda 31,0% nemese 379,0 mlrd teńgege ulǵaıǵan.
2021 jylǵy osy ýaqytpen salystyrǵanda respýblıkalyq bıýdjetke túsimderdiń eń kóp somasy munaıǵa salynatyn korporatıvti tabys salyǵy esebinen bolǵan. Naqtyraq aıtqanda, bul kólem 571,0 mlrd teńgege nemese eki esege artyq.
Ishki tutyný taýarlaryna qosylǵan qun salyǵy 433,2 mlrd teńge nemese 4,6 esege, eksporttyq keden bajdary boıynsha 311,9 mlrd teńgege nemese 2,1 esege, úshinshi elderden ımportqa QQS 90,4 mlrd teńgege nemese 39,0%-ǵa, Keden odaǵy elderinen ımportqa qosylǵan qun salyǵy 53,1 mlrd teńgege nemese 21,0%-ǵa, paıdaly qazbalardyń óndirisine salynatyn salyǵy 41,1 mlrd teńgege nemese 42,2%-ǵa óskeni baıqalady.
Memlekettik kirister komıtetiniń habarlaýynsha, túsimderdiń ósýine kóptegen faktorlar áser etken, sonyń ishinde baǵanyń ósýi de áser etip otyr. Aıtalyq, bıylǵy tórt aıda byltyrǵymen salystyrǵanda negizgi eksporttyq pozısııalarǵa, onyń ishinde munaıǵa – 65,1%, alıýmınııge – 51,9%, myryshqa – 40,9%, qorǵasynǵa – 16,5% jáne mysqa 15,4% baǵanyń ósýi baıqalǵan. Onyń ústine shıki munaıǵa salynatyn kedendik áketý bajynyń mólsherlemesi 56,4%-ǵa ulǵaıǵany da áser etken. Aıtalyq, 1 tonna úshin ortasha mólsherleme 2021 jylǵy qańtar-mamyr aıynda – 55,0 dollar bolsa, 2022 jylǵy qańtar-mamyr aıynda 86,0 dollar boldy.
Salyq túsimderin arttyrǵan taǵy bir faktor – bıylǵy 4 aıda úshinshi eldermen taýar aınalymy 1,5 esege ulǵaıny boldy. Naqtyraq aıtsaq, eksport 1,7 ese, ımport 1,2 ese ósti.
2022 jylǵy tórt aıda elektrondy shot-faktýralar derekteri boıynsha tutyný taýarlaryn óndiretin jáne qyzmetter kórsetetin, úı qyzmetshisin jaldaıtyn jáne úı sharýashylyqtary qyzmetteri 5,8 esege artqan. «Salyq túsimderiniń artýyna barlyq saladaǵy baǵalar men qyzmetter áser etedi. Bıylǵy alǵashqy aılarda kóptegen salanyń jumysy jandana tústi. Sonyń esebinen túsimder de kóbeıdi», delingen Memlekettik kirister komıtetiniń habarlamasynda.
