Jeksenbi kúni komandalar toptyq kezeńniń altynshy týr oıyndaryn ótkizdi. Bul týrda Qazaqstan quramasy Germanııa hokkeıshilerimen sheberlik baıqasty. Asa tartysty ótken matchta jerlesterimiz taǵy da bir shaıba aıyrmashylyǵymen jeńilip qaldy – 4:5. Bul – Iýrıı Mıhaılıs shákirtteriniń bir shaıba aıyrmashylyǵymen jeńilgen tórtinshi oıyny boldy. Al Germanııa quramasy alǵashqy týrda Kanadaǵa (3:5) ese jibergenimen, qalǵan oıyndardyń bárinde (Slovakııa – 2:1, Fransııa – 3:2, Danııa – 1:0, Italııa – 9:4) qarsylastarynan aılasyn asyrdy. Alty oıynda 15 upaı jınaǵan nemister merziminen buryn álem birinshiliginiń pleı-off kezeńine joldama aldy.
Úsh myńnan asa jankúıer tamashalaǵan Qazaqstan – Germanııa kezdesýinde esepti birinshi bolyp jerlesterimiz ashty. Básekeniń úshinshi mınýtynda kók jolaqtyń boıynda qarsylas oıynshynyń qateliginen keıin shaıbaǵa ıelik etken qurama kapıtany Roman Starchenko chempıonattaǵy alǵashqy golyn saldy. Arada eki mınýt ótkende qazaqstandyq jankúıerlerdiń qýanyshy sý sepkendeı basyldy. Nemister tarazy basyn jyldam teńestirip ketti. Býndesmanshaft hokkeıshileri besinshi mınýtta qorǵaýshy Ionas Mıýllerdiń jeke sheberliginiń arqasynda tablodaǵy kórsetkishti 1:1-ge ózgertti. Alystan baǵyttaǵan bul soqqy Andreı Shýtov úshin ońaı olja bolýy kerek edi, biraq qaqpashymyz Mıýllerdiń soqqysynyń aldynda dármensiz qaldy. 15-mınýtta Qazaqstan quramasy taǵy da esepte alǵa shyqty. Egor Petýhov eki qorǵaý-
shynyń qorshaýynda qalyp qoısa da, mergendigimen kózge tústi. Áıtkenmen, nemisterdiń qaıta tarazy basyn teńestirýine nebári 30 sekýndtyń ózi jetkilikti boldy. Bul joly Leonhard Pfederl gol soqty. Al úziliske bir mınýt qalǵanda Danıel Fıshbýh komandasyn esepte alǵa shyǵardy – 3:2. Bul jerde de Shýtov óte sátsiz oınady.
Ekinshi kezeńde quramalar bir-bir shaıba soqty. Úzilisten keıin muzaıdynda belsendi oınaǵan qazaqstandyq hokkeıshiler san basymdyǵyna ıe bolsa da, esepti teńestiretin múmkindikti utymdy paıdalana almady. Keıin Germanııa quramasy Álıhan Ásetov pen Kırıll Savıskııdiń qatar ereje buzýynyń saldarynan bir emes, eki oıynshy basymdyǵyna qol jetkizip, óz múmkindikterin sátti paıdalandy. Nátıjeli oıynymen kózge túsken Lýkas Reıhel quramasynyń tórtinshi shaıbasyn saldy. Sóıtip, ekinshi kezeńniń orta tusyna jetpeı jatyp eki shaıba aıyrmashylyǵymen esepte alǵa shyǵyp alǵan germanııalyqtar birte-birte qarqynyn báseńdetip, kúshin kelesi oıyndarǵa saqtap jatqandaı áser qaldyrdy. Al ýaqyt ozǵan saıyn belsendiligin arttyrǵan jerlesterimiz úziliske 30 sekýnd qalǵanda esep aıyrmasyn bir shaıbaǵa deıin qysqartty. Bul joly Pavel Akolzın dáldik tanytty.
Úshinshi kezeń bastalǵan bette Nıkıta Mıhaılıs tarazy basyn teńestirip (4:4), qazaqstandyq jankúıerlerdi bir serpiltip tastaǵan edi. Biraq ótken oıyndardaǵy qatelikterden tıisti qorytyndy shyǵarmaǵan bizdiń jigitter taǵy qorǵanysta jas balanyń qateligin jasap, bolmaıtyn jerde qaqpaǵa gol ótkizip aldy. Goldyń avtory – Iаzın Elıs. Bul jerde de qaqpashymyz sátsiz oınady. Osylaısha, Germanııa quramasy mańyzdy úsh upaıyn oljalap, týrnır kestesinde ekinshi orynǵa kóterildi. Al qatarynan altynshy oıynda jeńilgen Qazaqstan soqyr upaısyz kósh sońynda qalyp qoıdy.
Araǵa bir kún salyp jerlesterimiz sońǵy týrda elıtaly dıvızıondaǵy ornyn saqtap qalý úshin alty oıynda bir upaı jınaǵan Italııa quramasymen sheberlik baıqasty. Bas bapker Iýrıı Mıhaılıs ótken oıynmen salystyrǵanda bul joly negizgi quramǵa tek bir ǵana ózgeris jasady. Germanııamen bolǵan matchta jaraqat alyp qalǵan shabýylshy Kırıll Savıskııdiń ornyna «Saryarqa» oıynshysy Saıan Danııardy negizgi tizimge qosty. Alaıda bas bapker oǵan muzaıdynda óner kórsetýge múmkindik bermedi.
Kezdesý bastalǵan bette oıyn tizginin qolyna alǵan Qazaqstan quramasynyń hokkeıshileri alǵashqy kezeńniń bel ortasynan asqanda ǵana esepti ashty. Matchtyń 12-mınýtynda Kertıs Volk san basymdyǵyn júzege asyrsa, arada úsh mınýt ótkende qarsylas komanda da san basymdyǵynyń arqasynda tarazy basyn teńestirip ketti. Goldyń avtory – Brendon Maknellı. Birinshi kezeńniń aıaqtalýyna tórt mınýt qalǵanda qorǵaýshy Valerıı Orehov Qazaqstan quramasyn esepte qaıta alǵa shyǵardy.
Ekinshi kezeńde quramalar bir-bir shaıba almasty. 25-mınýtta Qazaqstan quramasy sapynan Álıhan Ásetov mergendik tanytsa, Italııa hokkeıshilerinen Dıego Kostner gol soqty. Úshinshi kezeńde jerlesterimiz taǵy da myqtylyq tanytty. 44-mınýtta Roman Starchenko artyq quramda oınaǵanda shaıba soqsa, eki mınýttan keıin Nıkıta Mıhaılıs oıynnyń núktesin qoıdy. Matchtyń sońyna qaraı Italııa quramasynyń bas bapkeri muzaıdynǵa altynshy hokkeıshini shyǵarǵanymen, onysy nátıje bermedi. Qorytyndy esep – 5:2. Osylaısha, Qazaqstan quramasy jalǵyz jeńisiniń arqasynda úsh upaımen segiz komandanyń ishinde jetinshi orynǵa taban tirep, elıtaly dıvızıondaǵy ornyn saqtap qaldy.
Deı turǵanmen, Qazaqstan quramasynyń bıylǵy chempıonattaǵy oıyny jankúıerlerdiń kóńilinen shyǵa qoıǵan joq. Jeti oıynyń tek bireýinde ǵana jeńiske jetý jaqsy nátıje emes ekeni aıtpasa da túsinikti. Endi federasııa basshylyǵy osy chempıonattan qorytyndy shyǵaryp, kelesi jylǵy álem birinshiliginde jarqyn óner kórsetedi dep úmittenemiz.
