2009 jyldyń 3 qazanynda Ázerbaıjannyń Nahchyvan qalasynda ótken Túrkitildes memleketter basshylarynyń IX sammıtindegi túrki dúnıesin zertteıtin halyqaralyq ǵylymı ortalyq qurý týraly usynysy biraýyzdan qoldaý tapty.
Osylaısha tarıhı Nahchyvan kelisimi negizinde 2010 jyldyń 25 mamyrynda Nur-Sultan qalasynda Túrki akademııasy resmı túrde óz jumysyn bastady.
Osydan keıin Qyrǵyz Respýblıkasynyń astanasy Bishkekte 2012 jyldyń 22-23 tamyzy kúnderi ótken Túrki Keńesiniń II sammıtinde Túrki akademııasyna halyqaralyq uıym mártebesin berý jóninde sheshim qabyldandy. Atalǵan qujat múshe memleketter parlamenterinde ratıfıkasııalanǵan soń 2014 jyldyń 28 tamyzynan bastap Túrki akademııasy halyqaralyq mártebege ıe boldy.
Búginde baýyrlas túrki elderiniń ǵylym jáne bilim berý salalaryn úılestiretin ınstıtýsıonaldy ıntegrasııalyq qurylymǵa aınalǵan Túrki akademııasy BUU, IýNESKO, IRCICA, ISESCO qatarly irgeli halyqaralyq uıymdarmen áriptestik baılanystar ornatyp, kóptegen aýqymdy jobalardy júzege asyrýda.
Týys elderdiń barshasymen joǵary deńgeıde baılanys ornatqan Túrki akademııasy Eýrazııa jáne Amerıka qurlyqtary ǵalymdarynyń qatysýymen 120-dan astam ǵylymı sharany júzege asyrdy. Buǵan qosa, álemniń kóptegen tilderinde 170-ten astam jańa ǵylymı eńbekti ázirlep shyǵardy.
Halyqaralyq Túrki akademııasy Túrki keńesi Sammıtinde Memleket basshylary bergen tapsyrmalardy joǵarǵy deńgeıde oryndaýda. Túrki yntymaqtastyǵy úshin mańyzdy birqatar qujatty ázirledi. Atap aıtqanda Túrki ıntegrasııasynyń tujyrymdamasy memleket basshylarynyń sammıtinde maquldansa, Akademııa daıyndaǵan ortaq oqýlyqtar baýyrlas elderge keń taralyp, mektep baǵdarlamalaryna engizilgen.
Akademııa janyndaǵy Nahchyvan kelisimi boıynsha qurylǵan Túrki kitaphanasynda 70 myńǵa jýyq kitap qory bar. Sonymen qatar túrki halyqtarynyń tereńnen tamyr tartatyn mol murasy Túrki mýzeıinde toptastyrylǵan.
Búgingi tańda Halyqaralyq Túrki akademııasy túbiri bir túrki halyqtarynyń altyn arqaýyna aınalyp úlgerdi.
