Erlan Qarın aldymen oblys aktıvimen jolyqty. Oblys ákimi Qumar Aqsaqalov óńirdiń áleýmettik-ekonomıkalyq damýy men ınfraqurylymdyq jobalardyń oryndalýy jaıynda baıandady. О́z kezeginde Memlekettik hatshy aldaǵy konstıtýsııalyq reformanyń negizgi baǵyttary týraly aıtty. Sondaı-aq júzege asyrylatyn reforma halyqtyń eldi basqarý isine aralasýyn arttyrýǵa jáne saıası prosesterdi demokratııalandyrý isin odan ári jalǵastyrýǵa múmkindik beretinine nazar aýdardy.
Oblystyq ákimdiktegi kelesi kezdesýinde ol qoǵamdyq belsendiler, ÚEU, keńester múshelerimen kezdesti. Sońǵy kezdesýin S.Muqanov atyndaǵy oblystyq ámbebap kitaphanada jalǵastyryp, jastar ókilderimen, belsendilerimen kezdesti. Erlan Qarın elimizdiń aldynda turǵan mańyzdy is-shara – referendým týraly keń kólemde túsinikter berdi. Memleket basshysy usynyp otyrǵan Konstıtýsııaǵa engiziletin ózgerister eldi demokratııalandyrýǵa jasalǵan batyl qadam ekeni aıtyldy. О́zgeriske túsetin 33 baptyń árqaısyna keńinen toqtalyp, árqaısynyń mańyzyn jetkizdi. Sonyń ishinde konstıtýsııalyq sottyń qaıtadan qalpyna keltirilýiniń qarapaıym adamdardyń quqyǵyn qorǵaýdaǵy mańyzy týraly aıtty. «Burynǵy Konstıtýsııalyq Keńeske tek Prezıdent qana qaıyrylýǵa quqyly bolsa, endi Konstıtýsııalyq Sotqa Prezıdent te, Premer-Mınıstr de, depýtattar da jáne qarapaıym adamdar da qaıyrylýǵa qol jetkizetin bolady. Bul árbir adamnyń óz quqyn qorǵaýyna mol múmkindik beredi. Al adam quqy jónindegi ókil tipti sot «aryzdanýǵa bolmaıdy» dep shyǵarǵan úkimdi de Konstıtýsııalyq Sottyń qaraýyna usyna alady», dedi ol. Memlekettik hatshy saılaý týraly ózgeristerge jeke-jeke toqtalyp, olardyń mańyzdylyǵyn da jete túsindirip berdi. Prezıdenttiń saıası partııaǵa múshe bolmaýy týraly da aıtty. Konstıtýsııaǵa engiziletin jańa ózgeristerdi Prezıdenttiń Ekinshi Respýblıkaǵa teń bolady dep baǵalaǵandyǵy týraly da tereń túsinikter berdi.
Memlekettik hatshyǵa otyrǵandar kóptegen suraq qoıdy. Sonyń ishinde Assambleıanyń quqyna qatysty suraqtar da boldy. Sonymen birge jergilikti máseleler týraly óńirler de ózindik referendýmdar ótkizýine bola ma degen sııaqty máseleler de alǵa tartyldy.
О́ńirge jumys sapary barysynda Memlekettik hatshy óńirdegi jastar uıymdarynyń belsendilerimen de kezdesti. Onda jas urpaqtyń qoǵamdyq jumystarǵa belsendi aralasýyn arttyrý jáne jastarǵa qatysty jobalardy qoldaý máseleleri qozǵaldy. Kezdesý qorytyndysy boıynsha Erlan Qarın jastardyń referendým men saıası reformalarǵa úlken qyzyǵýshylyq tanytyp otyrǵanyn atap aıtty.
Jalpy alǵanda, oblys jurtshylyǵy elimizde atqarylyp jatqan saıası jańǵyrý úderisterin jiti baqylap otyrǵanyn aıtyp, qolǵa alynǵan reformalardy júzege asyrýǵa daıyn ekenderin jetkizdi.
Soltústik Qazaqstan oblysy
