− Biz Aýstralııada bir aıǵa jýyq boldyq. Alǵan áserim keremet, ony sózben aıtyp jetkize almaımyn, − dep bastady sózin Shuǵyla bizben áńgimesinde.
− Jalpy, álemdik shoýda segiz gala balet baǵdarlamasy kórsetilse, biz eki balet qoıylymyn usyndyq. Bekzat ónerdi súıetin kórermenderge «Spartak» baletin tartý ettik. Bul týyndy Aýstralııada jıi qoıylmaıdy. Sondyqtan jurtshylyq jańa premera kórgendeı erekshe áser aldy. Bizge rızashylyqtaryn bildirdi. Sodan keıin Baqtııar da, men de jeke repertýarymyzdan óner kórsettik. Jup bolyp ta bıledik. Balet – óte kirpııaz, aqsúıek óner. Únemi izdenip, talmaı eńbektený kerek. Bul óner ár elde ártúrli damyǵan. Biz kóbinese Eýropada balet óneri damyǵan dep sanaımyz. Ol durys. Biraq qazaq baleti de eshkimnen kem emes. Oǵan ózimniń baǵdarlamam aıasynda kózim jetti. Alaıda meni Kovent-Garden Koroldik baleti, Amerıkalyq balet teatry jáne Kvınslend baleti ártisteriniń tehnıkalyq sheberligi tánti etti. Sahnada ózderin sabyrly ustaıdy. Ásirese amerıkalyq balerınanyń ózindik órnegi tańǵaldyrdy. Sonymen birge is-shara sheńberinde sheberlik saǵaty ótip, bilikti mamandardan dáris alyp, tájirıbe jınaqtadyq. Sebebi balet ártisine tájirıbe jınaý eshqashan artyq emes, − dedi ol.
Shuǵyla Ádephannyń «Astana Operadaǵy» alǵashqy debıýti «Baıaderka» baletindegi Gamzattı rólinen bastaldy. Bul qoıylymdy belgili horeograf Altynaı Asylmuratova sahnalady. «Baıaderkadaǵy» oqıǵa Úndistanda oryn alǵan. Ǵıbadathana qyzmetshisi – baıaderka Nıkııaǵa Uly bramın jáne aıbyndy jaýynger Solor ǵashyq bolady. Bul jaǵdaıdan beıhabar radja Dýgmanta Solorǵa qurmet kórsetip, oǵan qyzy Gamzattıdi uzatqysy keledi. Mundaǵy Gamzattıdiń bolmysy qatal, órkókirekteý, eshkimge basyn ıe qoımaıtyn jan. Biraq Shuǵylanyń minezi jumsaq, bııazy. Sonda da ol keıipkeriniń «kiltin» tabý úshin biraz izdendi. Osy týyndy týraly jazylǵan dúnıelerdi oqydy, eski qoıylym beınetaspalaryn qarady. Ustazdarymen keńesti. Aqyry, sahnaǵa Gamzattı obrazyn ózine tán ereksheligimen, shynaıylyǵymen oınap shyqty. Kórermender de jas ónerpazdyń alǵashqy aıaq alysyna rıza boldy. Odan keıin Iý.Grıgorovıchtiń horeografııasyndaǵy P.Chaıkovskııdiń «Shelkýnchık» spektaklinde Marı rólin oınap, jańasha qyrynan kórindi. B.Asafevtiń ańyzǵa aınalǵan «Baqshasaraı burqaǵy» dramalyq baletinde Marııa partııasyn sheber somdady. Ásirese L.Mınkýstyń tanymal «Don Kıhot» baletinde Bazıldiń súıiktisi qylyqty Kıtrı róli – ony jańa bıikke kóterdi. Ulttyq balet ónerine talantty jas balerınanyń kelgenin kórsetti.
«Kıtrıdi» oınaý – maǵan jeńil bolǵan joq. Bul qoıylym tehnıkalyq jaǵynan óte kúrdeli. Únemi sahnada júresiz. Demalmaısyz. Biraq Kıtrı − erkindikti jaqsy kóretin qyz. Sol minezi maǵan qatty unady. Osy minezin ashýǵa tyrystym. Balet ónerinde bıshiniń ár qımyly sóılep turý kerek. Biz sol arqyly keıipkerimizdiń harakterin ashamyz. Biraq oǵan sheberlik qajet. Sondaı-aq rólińizdi jan dúnıeńizden ótkizbeseńiz, kórermendi sendire almaısyz. Sondyqtan ár obrazyma janymdy salamyn», deıdi keıipkerimiz shyǵarmashylyq qupııasynan syr tartyp.
Ár talant ıesiniń ónerge kelýi de qyzyq. Bireýi týmysynan daryndy bolyp týyp, birden jarqyrap kórinse, endi biri ónerge kezdeısoq kelip, tanymal bolady. Biz keıipkerimizdi birinshi topqa jatqyzar edik. Ol úsh jasynan bastap, bı bıleýdi jaqsy kórgen. Sony baıqaǵan ata-anasy ony alty jasynda astanadaǵy bı stýdııasyna beredi. Osy stýdııaǵa bara júrip, balalar arasyndaǵy bı baıqaýlaryna qatysyp, júldeli oryndar ıelenedi. Odan ári bıshilik ónerin ushtaý úshin toǵyz jasynda A.Seleznev atyndaǵy Almaty horeografııalyq ýchılıshesine oqýǵa túsip, Maıra Túkeeva jáne Raýshan Tólegenova sekildi bilikti ustazdarynan tálim aldy. Bı óneriniń qyr-syryn meńgerdi. 2016 jyly astanadan Qazaq ulttyq horeografııa akademııasy ashylǵanda soǵan aýysyp, oqýyn osynda aıaqtady. 2017 jyly «Astana Opera» teatryna jumysqa qabyldandy.
Onyń keıingi oınaǵan keıipkerleriniń biri – «Parıj Qudaı-Ana sobory» spektaklindegi – Esmeralda. Bul týyndyny belgili horeograf Rolan Petı qoıǵan. Esmeralda – sygan qyzy. О́zi bostandyqty, erkindikti unatady. Eshkimge táýeldi bolǵysy kelmeıdi. Minezi de bólek. Osy keıipkerdi Shuǵylanyń ózi de jaqsy kórip, tamasha somdady. Sygan qyzynyń erkindigin kórkem kesteledi.
Shuǵyla úshin «Astana Opera» teatryndaǵy balet trýppasynyń kórkemdik jetekshisi, Reseı halyq ártisi Altynaı Asylmuratovanyń orny bólek.
«Álemge tanymal balet juldyzynan dáris alyp, birge jumys istep júrgenimdi mártebe sanaımyn. Ol kisiniń aıtqan árbir pikiri – biz úshin óte qundy.Bolashaqta ónerimdi ári qaraı damytyp, álem sahnalarynda óner kórsetsem dep armandaımyn. A.Adannyń «Jızel» baletinde Jızeldi, «Baıaderka» baletinde Nıkııany oınaǵym keledi. Biraq bul rólderdi joǵary deńgeıde somdaý úshin áli de shyńdala túsý qajet. Sondyqtan qazir kúndiz-túni eńbek etip, izdenip júrmin. Maqsatqa jetý de ońaı emes. Ásirese óner adamyna tabandylyq pen minez kerek ekenin túsinemin», deıdi balet ártisi.
Sonymen qatar jas balerına sahnada birge jup bolyp óner kórsetip júrgen Baqtııar Adamjan, Erkin Rahmatýllaev, Serik Naqyspekov sekildi áriptesteriniń ónerin de joǵary baǵalaıdy. Búginge deıin daryndy bıshiniń óner jolyndaǵy jetistikteri de aıtarlyqtaı. Máselen, 2013 jyly Qazan qalasynda ótken «Morozko» halyqaralyq balet ártisteri baıqaýynda birinshi oryn alsa, 2014 jyly Almatydaǵy «О́rleý» halyqaralyq balet ártisteri konkýrsynda ekinshi oryn ıelendi. 2016 jyly Berlınde ótken Tanzolymp halyqaralyq baıqaýynda júldeger atanyp, el mereıin ósirdi.
Keıipkerimizdiń taǵy bir ereksheligi – qazaqy tárbıede óskendigi. Inabattylyǵy boıynan baıqalyp turady. «Ákem – qazaq eliniń patrıoty. Bizdiń otbasymyzda tek qazaqsha sóıleımiz. Ata-anamnyń keıde basqa tilde shúldirlep júrgen jastardy kórgende kóńil kúıi túsedi. Bizge ol kisiler bala kúnimizden tilimizdi, dinimizdi, salt-dástúrimizdi qadirleýdi, qurmetteýdi úıretti. Men oryssha da, aǵylshynsha da erkin sóıleımin. Biraq ana tilimdi bárinen joǵary qoıamyn» deıdi. Onyń esimin «Shuǵyla» dep kindik ákesi qoıypty. Shuǵyla − tańǵy shýaq shashqan kún beınesi degen maǵyna beredi.
Keıingi jyldary ónerdiń ár salasynan top jaryp shyqqan qazaq jastary elimizde ǵana emes álemge tanylýda. Solardyń aldyńǵy leginen «Astana Opera» teatry balet trýppasynyń daryndy solısi Shuǵyla Ádephandy da kóremiz.
